Бейсенбаев: «AMANAT» сайлауалды уәделердің орындалуын қамтамасыз етуі қажет

Бейсенбаев: «AMANAT» сайлауалды уәделердің орындалуын қамтамасыз етуі қажет

Бүгін Алматыда партияның қалалық филиалының кезектен тыс XXXIII конференциясы өтті. Конференцияны ашқан «AMANAT»-тың Атқарушы хатшысы Елнұр Бейсенбаев партияның «Халықпен бірге!» сайлауалды бағдарламасын жүзеге асыру бойынша аманаттықтардың алдына бірқатар міндет қойды. «Біз сайлауалды уәделеріміздің орындалуын қамтамасыз етуіміз қажет. Сайлауалды бағдарламалардың әр тармағына мәслихаттың жауапты депутаттарын бекіту керек. Сайлауалды уәделердің орындалуына жүйелі бақылау жасау мақсатында ел аумағында партиялық бақылау бекеттері ашылады. Мұндай бекеттер, ең алдымен, әлеуметтік маңызы бар нысандардың құрылысын бақылауға алады», – деп атап өтті Атқарушы хатшы. Айта кетейік, «Өзгерістер жолы: әр азаматқа лайықты өмір!» партиялық бағдарламасын жүзеге асыру аясында 2021-2022 жылдары қалада шамамен 3,3 млн шаршы метр тұрғын үй салынды. Кезекте тұрғандар арасында 8 мыңнан астам пәтер бөлінді. 570 аула аумағы абаттандырылды. 23,5 мың оқушы орнына лайықталған 43 жаңа мектеп және қосымша ғимараттар салынды, 12 мың орындық 182 балабақша ашылды. 500 шақырымға жуық автожол қайта жөнделді, 2 метро стансасы іске қосылды және өзге де игі істер атқарылды. Қазіргі уақытта Алматыда партия қатарында 52 мыңға жуық адам бар. Сондай-ақ 246 бастауыш партия ұйымы жұмыс істейді.