Түркістан облысында өзенге ағып кеткен 5 жасар қыз іздестіріліп жатыр. Еңбек ауылында ойнап жүрген бүлдіршін Нұрикамал Нұрхатқызы Арыс өзеніне түсіп кеткен. Оның суға құлағанын өзінен бір жас үлкен әпкесі көріпті, алайда 4 тәуліктен бері табылмай жатыр деп хабарлады turkystan.kz КТК арнасына сілтеме жасап.
Іздеу жұмысына аудан мен облыстың құтқарушылары жұмылдырылған. 150-ге жуық ауыл тұрғындары да Нұрикамал Нұрхатқызын іздеуге атсалысуда. Өзен бойын иісшіл итпен тінтісе де, ешқандай із табылар емес. Іздеуге кеше жауған жаңбыр да кесірін тигізген.
Баланың туыстары көрші ауданнан қосымша күш тартуды сұрап отыр. Ал құтқарушылар ағысы қатты Арыс өзенін сүзіп шығу қиын екенін айтады.
«Әзірше іздеу нәтижесіз. Арыс өзені таудан бастау алады. Қазір секундына 50 текше метр су өтіп жатыр. Ағысы өте қатты және иірім жері өте көп. Осыған байланысты іздеу жұмыстарын қиындатып тұр», - деді Түркістан облысы ТЖД басқарма басшысы Талғат Досалиев.