Баласын ұрып-соққан елордалық әйелге айыппұл салынды
Астана қалалық кәмелетке толмағандардың істері жөніндегі мамандандырылған ауданаралық сотының шешімімен өзінің баласын ұрып-соққан әйелді әкімшілік жауапқа тартты деп хабарлады turkystan.kz.
Құзырлы органның мәліметінше, құқықбұзушылық жасаған әйел екі бүлдіршіннің анасы. Сотта оның баланы тәрбиелеу, білім беру және олардың құқығын қорғау сияқты ата-ана міндетін орындамағаны анықталды.
«2022 жылдың қыркүйегінде К. азаматтық некедегі күйеуімен арадағы кикілжің барысында өзінің қызын ұрып-соғып, денсаулығына жеңіл дәрежеде зиян келтірген. Сотта К. өзінің құқықбұзушылық жасағанын мойындады.
Оның кінәсі көршілерінің куәлік етуімен, полиция қызметкерінің мәліметтері және сот-медициналық сараптаманың қорытындысымен расталды», – делінген соттың ресми сайтында жарияланған хабарламада.
Белгілі болғандай, жаза тағайындау кезінде жауапкершілікті жеңілдететін мән-жайлар ескерілген. Атап айтқанда, кінәні толық мойындау, жасаған ісіне өкіну және ауыр зардаптардың болмауын ескере келе, сот шешімімен әйелге 21 441 теңге көлемінде әкімшілік айыппұл салынды.
