ҚТЖ қызметкері 82 млн теңге қаржы жымқырған

Қазақстан темір жолы ұлттық компаниясының қызметкері 82 млн теңгеден астам қаржыны компанияда жұмыс істемейтін адамдардың атына еңбек демалысы төлемі ретінде аударып, қолды қылған деп хабарлады turkystan.kz Алматы көлік прокуратурасының баспасөз қызметіне сілтеме жасап. Алматы көлік прокуратурасы «ҚТЖ Жүк тасымалы» «Алматы жол бөлімшесі» филиалының лауазымды тұлғасының аса ірі мөлшерде ақша ұрлау фактісін анықтады. К. лауазымды тұлға мекемеге қатысы жоқ азаматтардың банктік шоттарына 82 млн теңгеден астам соманы демалыс төлемі ретінде аударған. Сондай-ақ, ол аударылған соманы өз қажеттілігіне жұмсаған. «Аталған факт бойынша материалдар Қылмыстық кодекстің 189-бабы 4-бөлігінің 2-тармағы бойынша «аса ірі мөлшерде кінәліге сеніп тапсырылған мүлікті иемдену немесе ысырап ету» бойынша сотқа дейінгі тергеп-тексеру іс жүргізу шешімін қабылдау үшін экономикалық тергеу қызметіне жіберілді. Алматы қаласы Алмалы аудандық сотының 17 қаңтардағы үкімімен К. 5 жыл мерзімге лауазымды қызметпен айналысу құқығынан айрыла отырып, кінәлі деп танылып, 7 жылға шартты түрде сотталды», - деп хабарлады ведомстводан. Үкім заңды күшіне енді. Келтірілген материалдық залал толығымен өтелді.