Қазақстандықтар Түркияға 100-ге жуық киіз үй жібереді

Қазақстандықтар Түркияға 100-ге жуық киіз үй жібереді

Қазақстандықтар Түркияда жер сілкінісінен зардап шеккендерге 100-ге жуық киіз үй жібереді деп хабарлады turkystan.kz. Көмекті ұйымдастырған журналист Нұрбек Бекбау қазақстандықтардың 20 млн теңгеден астам қаражат жинағанын айтты. 17 млн 300 мың теңгеге 45 киіз үй алынған. Кейін тағы 2 млн 700 мың теңгеге тұрмыстық заттар (ошақ, қазан, ыдыс-аяқ) алынады. Одан бөлек, отандық кәсіпкерлер 50 киіз үй сатып алып, әуежайдың қоймасына жеткізген. «Киіз үйдің психикалық, психологиялық маңызы да бар. Түріктер Қазақстанды «Атажұрт» деп атайды, өйткені Қазақстан аумағы – барлық түркілердің, оның ішінде қазіргі түріктердің ата-бабаларының Отаны. Біз Түркиядағы бауырларымызға әрқашан көмек көрсететінімізді және ынтымақты көрсеткіміз келеді», - деді Нұрбек Бекбау.