Павлодар облысындағы жаңажылдық шыршаға 7,8 млн теңге бөлінген

Павлодар облысы Ақтоғай елді мекеніндегі жаңажылдық шыршаны сатып алуға 7,8 млн теңге бөлінген. Бұл туралы "Әділдік жолы" бірлестігінің директоры Дидар Смағұл Facebook-тегі парақшасына жазды, деп хабарлады turkystan.kz. Жасанды шыршаны сатып алуға және безендіруге конкурс 2022 жылғы қарашада жарияланған. Ал 2022 жылғы 9 желтоқсанда 5,5 млн теңгеге KAZSUPPLIER-2018 ЖШС жеңімпаз атаныпты. Алайда,  шарт жасасу кезінде жеңімпаздың жосықсыз қатысушылар тізімінде болғанына байланысты шарт "Айстар" ЖШС-мен 7,8 млн теңгеге жасалған. Сонымен қатар, шарт мемлекеттік сатып алу порталында 28 желтоқсанда сағат 10.31-де жасалған және екі сағаттан кейін жергілікті әкімдік орындалған жұмыстар актісіне қол қойған. Шарт жасасуға, шыршаны орнатуға және безендіруге 2 сағат қана уақыт кеткен. Оған қоса, шыршаның бағасы оның "жағдайына" сәйкес келе қоймайды. Мәселеге байланысты қоғам белсенділері сыбайлас жемқорлықпен күрес қызметіне хат жолдайтындарын мәлімдеді.