Торғын ӘШЕНОВА,
«Омбы қазақтары» ұйымының негізін қалаушысы:
Қазақстан Президенті TÚRKISTAN газеті арқылы бізді таныды
– Ең алдымен TÚRKISTAN газетінің ұжымына алғыс айтқым келеді. Менің ойымша, TÚRKISTAN газетіне шыққан мен туралы сұхбат Қазақстан Президенті Қасым-Жомарт Тоқаевтың назарына іліккен соң ол «Ресейде де қазақтың осындай батыр қыздары тұрады екен ғой» деп ой түйген секілді. Әрі Қазақстандағы ұйымдардан кем түспей, Ресейде туып-өссек те қазақ тілі мен ділін ұмытырмау үшін атқарып жүрген қыруар шаруамыз туралы естіп-білсе керек. Қазақстан Президенті TÚRKISTAN газеті арқылы бізді таныды десем, артық айтпаймын. Расымен, TÚRKISTAN Президенттің бізді танып-білуіне үлкен септігін тигізді. Бұл біз үшін күтпеген жағдай болды. Былтыр қыркүйек айында бізге Қазақстанның Омбыдағы Бас консулдығынан хабарласып, өзіміз туралы деректер мен өмірбаянымызды жіберуімізді сұрады. Президент Аппаратынан ұсыныс келіп түскенін ғана айтты, басқа нақты ақпарат айтылмады. Сондықтан бұл награда үлкен тосынсый болды. Жалпы, бұл мен үшін ғана емес, бәрі үшін күтпеген жағдай болған секілді. Өйткені Ресейде біз секілді қазақ мәдениетін дәріптеп жүрген қоғамдық ұйым көп, бір ғана біздің аймақта бірнеше ұйым белсенді жұмыс істейді. Қоғамдық қызметіңе байланысты мемлекеттік марапатқа лайық деп танылу көңілімізді көкке көтеріп жіберді. Қазақ тілі мен мәдениетін сақтап қалу, оны қазақы ортада насихаттау, бұл игі іске қазақ жастарын жұмылдыру үшін сарп еткен еңбегің мен алтындай уақытыңның осылай жоғары бағаланғаны екі есе қуаныш сыйлайды. Бүгінге дейін бірнеше награда иелендім. 2016 жылы Омбы облысы губернаторының сыйлығын алдым. Сосын аймақтық телеарна көрермендерінің таңдауы бойынша өз аймағымда «Жыл адамы» атандым. 2017 жылы С.Манякин атындағы Омбы облысының даму қоры «Сібір әйелі» деген атаққа лайық деп таныды. Әлбетте, бұл марапаттармен салыстырғанда Қазақстан Президенті Қасым-Жомарт Тоқаевтың атынан табысталған «Шапағат» секілді бәсі биік, мемлекеттік награда алу – мен үшін үлкен мәртебе. 20 желтоқсанда Ресейдегі Қазақстан елшілігінің өкілдері хабарласып, Мәскеуде салтанатты түрде марапаттайтынын айтты. Мемлекеттік награданы алған кезде біздің ұйымның әлеуметтік желідегі парақшаларына Қазақстан, Ресейдегі таныстарым, ағайын-туыстар, әріптестерім, замандастарым ыстық лебіздерін қарша боратып, тілектес екенін білдірді. Гүлнара екеуіміз мұндай реакцияға қатты қуандық. Маған Омбыдағы достарым құрмалдық жасау туралы ұсыныстар айтуда. Олар «Президенттің қолы қойылған награданы алу – екінің біріне бұйырмаған бақ» дегенді алға тартады. Қазақстан – біздің тарихи Отанымыз. Әркез біз алаңдайтын алып ел. Қоғамдық жұмысты қолға алғалы бері Қазақстанмен тығыз байланыс орнаттық, әлі де талай келісім туралы уағдаласамыз. Осындай қыруар шаруаларымыз ұмыт қалмай, қазақ мәдениетімен байланысты жұмысымыздың еленіп, ескерілгеніне өте қуаныштымын!
Гүлнара ТӨЛЕШОВА,
Красноярскідегі «Ақ Жайық» қазақ ұлттық-мәдени автономиясының негізін қалаушылардың бірі:
Бұл марапат – менің емес, «Ақ Жайық» автономиясының наградасы
– Красноярск – ірі, іскерлік, өндірістік, ең бастысы Шығыс Сібірдегі ең үлкен мәдени орталық. Енисей жағалауында орналасқан бұл аймақта қазақ халқының ұрпағы татулықта өмір сүреді. Қазақстан Президенті Қасым-Жомарт Тоқаевтың Красноярскідегі қазақтар мен онда Қазақстаннан оқуға келген жастардың рухани және мәдени байланысын нығайту үшін жасаған еңбегімізді қолдап, дәрежесі жоғары марапатқа лайық деп танығаны – мен үшін үлкен мәртебе. Красноярск өлкесінде қазақ мәдениетін насихаттап жүрген үлкен топтың арасында қазақтар ғана емес, Қазақстаннан осында қоныс аударған орыс ұлтының өкілдері де бар. Олар қазақтың дәстүрі мен әдеп-ғұрыптарын ерекше бағалайды. Ең бастысы, қазақ көп шоғырланған алып қалалардан алыс орналасқан Шығыс Сібірдегі Красноярск қаласында біздің ұйымның еңбегі бағаланғанына өте-мөте қуаныштымын. Осыдан кейін біз туралы Ресей, Қазақстан, тіпті шетелдегі қандастар білетін болады. Бұдан соң «Красноярск секілді қалада қазақ мәдениетін дәріптеп жүрген бір ұйым бар екен-ау» деп ой түйетіні анық. Білесіз бе, аты-жөніміз жазылған «Шапағат» мемлекеттік наградасын алған кезде менде бұл марапат тек маған арналған деген ой мүлде болмады. Бұл марапат – менің емес, «Ақ Жайық» автономиясының наградасы. «Ақ Жайық» – бұл біздің шағын отбасымыз. Онда бізге көмектесетін әр белсендінің болашағы зор. Алдағы уақытта да мұндай жемісті ынтымақтастық жалғасады деп сенеміз. Бүгінде Красноясркіде қазақ мәдениетінің дамуына үлес қосқысы келетіндер саны көбейіп келеді. Бізге келгісі келетін әр қонақ, әр белсенді, қасымыздан өтіп бара жатқан жолаушы Красноярскіде қазақ мәдениеті қарқынды түрде насихатталып жүргенін біле алады. Бізбен бірге отырып, шай ішіп, өзін қызықтырған деректерді сұрай алады. Ресей Федерациясының аумағында Қазақстан Республикасының атынан осындағы Төтенше және өкілетті елшісі Ермек Көшербаев секілді өте сауатты, білікті мамандардың тиянақты жұмыс істеп жүргені көңіл қуантады. Жүйелі түрде жұмыс істейтіні көрініп тұр. Ең батысы, Ресейдің бірнеше өңірінде тұрып жатқан қазақтардың тұрмыс-тіршілігіне бейжай қарамайтыны анық байқалады. Біз көтерген бастамаларға да әркез қолдау білдіретіні жүректі жылытады. Қазақстан Президенті Қасым-Жомарт Тоқаевтың бұл марапатқа бізді лайық танығанына тағы да алғыс білдіремін. «Жер тарихы – ел тарихы» деген мақал бар. Біздің жағдайымызда жер тарихы – бұл қазақ халқының тарихы. Қайда жүрсек те, қазақ тарихын ұмыттырмауға тырысамыз. Ел ішінде «Егер тез жүргің келсе, жеке жүр. Ал егер алысқа барғың келсе, топпен бірге жүр» деген нақыл сөз бар. Бұл нақыл маған әрі біздің автономияға қатысты айтылғандай. «Ақжайық» белсенділерінің ортақ жұмысы арқасында бізде осындай мемлекеттік награда бар. Біздің автономиядағы әр белсенді ғылым, спорт, мәдениет, ақпарат саласында еңбек етеді. Біз олардың әрқайсысына көмектесуге тырысамыз. Олар ұсынатын жаңа идеялар мен жаңа коллаборацияны қолдауға әркез дайынбыз. Жоғарыда айтып өткенімдей, алысқа барғымыз келсе, үнемі бірге жүретініміз де сондықтан. Әрі осы тұста Сібірдегі біздің көршілеріміз, біз секілді «Шапағат» мемлекеттік медалін алған «Омбы қазақтары» ұйымын бұл жетістігімен құттықтағымыз келеді. Сондай-ақ «Отандастар» қорына, TÚRKISTAN газетінің ұжымына, Красноярск қаласының әкімшілігі мен бізге бағыт-бағдар көрсеткен елші Ермек Көшербаевқа алғыс айтқым келеді. Көңілді жайландырған бір ерекше жайт, бізге бұл марапатты табыстаған кезде бұл іс-шараның ресми, іскерлік, қатаң түрде емес, жылы шыраймен, еркін стильде өткені ерекше сезілді. «Мен – шенеунікпін, сен басқасың» деген сыңай мүлде болған жоқ. Осы үшін Ермек Көшербаевқа ерекше алғыс айтқым келеді. Сосын дөңгелек үстел басында өткен жылдың бірер мәселесін сөз етіп, келер жылға бекітілген жоспарды талқылап, соңында бір-бірімізге құттықтау сөздер айттық. Ең кереметі, бұл кездесуде елшіліктегілер біздің мүддемізді бәрінен биік қойып, келер жылы бізге не қажеттінің бәрін сұрады. Біз айтқан талап-тілектер алдағы уақытта ескеріледі деп сенемін. Шынымды айтсам, қазіргідей жас кезімде «Шапағат» секілді мемлекеттік награданы алғаныма әлі күнге дейін сене алар емеспін. Өз мәдениетін «иығына» салып, арқалап жүрген әрбір азамат менің сезінгенімді сезінсін, мен секілді төбесі көкке көтерілсін деп тілеймін. Бәріңізге сәттілік тілеймін!