«АMANAT» партиясы Ақмола облыстық филиалының төрағасы сайланды

Жиынға саяси және қоғамдық кеңес мүшелері, мәслихат депутаттары, бастауыш партия ұйымдарының өкілдері, «Жастар рухы» жастары қатысты. Күн тәртібінде облыстық партия ұйымының, депутаттық фракцияның өткен кезеңдегі есебі қаралды. Делегаттардың дауыс беруімен Айна Мысырәлімова «АMANAT» партиясы Ақмола облыстық филиалының жаңа төрағасы болып сайланды. Басқосуда Айна Мысырәлімова партияның негізгі жұмыстарына тоқталды.

Оның айтуынша, биыл 7 мыңға жуық өтініш түсіп, оның 60 пайыздан астамы оң шешімін тапты.

Азаматтық қоғаммен диалог жүргізу үшін тұрғындардың өзекті мәселелерін талқылау және сайлау алдындағы уәделердің орындалуына мониторинг жүргізіледі. Ол үшін «Аmanat» партиясы жанынан 20 партиялық бақылау комиссиясы және түрлі бағыттар бойынша 105 қоғамдық кеңес жұмыс істейді. «Жер аманаты» комиссиясы арқасында  партия, мемлекет және құқық қорғау органдарының бірлескен күшімен бүгінде облыс бойынша мемлекет меншігіне қайтарылған жер көлемі 302,3 мың гектарды құрап отыр. «Ауыл аманаты», «Бақытты отбасы», «Кедергiсiз келешек», «Ардагерлердi ардақтайық» жобалары да қарқынды жұмыс істеп жатыр. Облыстық мәслихаттағы партия фракциясының жетекшісі Ғалым Бекмағамбетов есепті кезеңге қорытынды жасады. Ал «АMANAT» партиясының хатшысы Жігер Қалиев алдағы сайлау кезеңінде партия мүшелерінің алдында тұрған басым міндеттерді атап өтті.