Алматыда жастар форумы өтті

Алматыда жастар форумы өтті

Алматыда жастар форумы өтті
ашық дереккөзі
Оңтүстік астанадағы іргелі оқу орындарының бірі Менеджмент университетінде жастарды БҰҰ ТДМ және ESG-ды іске асыруға арналған «ESG және БҰҰ ТДМ-дағы инновациялық шешімдер мен көшбасшылық» атты жастар форумы өтті, деп хабарлады turkystan.kz.  Аталған форумды оқу орнының жанындағы AlmaU  ESG мен Тұрақты даму орталығы алғаш рет ұйымдастырып отыр. Іс-шараға ғылым саласындағы көрнекті қайраткерлер, халықаралық ұйымдардың, ҮЕҰ-ның және корпоративтік сектордың өкілдері және Алматының жоғарғы оқу орындардың беленді де білімді жастары қатысты. Форумды кіріспе сөзімен ашқан оқу орнының ректоры Гүлнар Күренкеева аталмыш шараға қатысушыларды шын жүректен құттықтай келе, мұндай жиындардың өтуі жас мамандардың білімі мен біліктілігінің артуына зор ықпал ететінін жеткізді. Одан кейін ҚР Ғылым және жоғары білім министрі Саясат Нұрбек форумға қатысушыларды видеоүндеу арқылы  құттықтап, жастарға сәттілік тіледі. Министр сондай-ақ айтулы іс-шараның AlmaU-да өтіп жатқанына қуанышты екенін сөз етті.  width= AlmaU-дің ғылым жөніндегі проректоры Бахытжан Саркеев, «Сессия мен іс-шараның форматы, күтілетін нәтижелер» тақырыбында ауқымды баяндама жасады. YOLO House компаниясының өкілдері «Tik Tok платформасында қаражат жинаудың жаңа трендтері» тақырыбында болашақ мамандар үшін қызықты тренинг-семинар өткізді. Жастар мен келушілердің алдында сөз сөйлеген Тұрақты даму орталығы секретариатының директоры Бақытгүл Хамбар осы саладағы жетістіктері туралы айтып, тәжірибесімен бөлісті. Ол Алматыдағы «Аналар үйі» бастамасы  осы бағыттағы сәтті жобалардың бірі екенін де ерекше атап өтті. БҰҰ Жаһандық коммуникациялар департаментінің өкілі Властимил Самек,  Narxoz University Қазақстанның тұрақты даму ғылыми-зерттеу институтының директоры  Брендан Дюпрейлер әлемдік тәжірибе көрсеткен тұрақты дамуды алға қоюда осындай форумдардың жиі ұйымдастырылуы маңызды екенін айтты. AlmaU-дың Тұрақты даму және ESG орталығының басшысы Айнар Нұрғалиев осы форум арқылы жастар әлеуметтік және экологиялық проблемаларды шешу жолдарымен танысып, тәжірибе алмасуға керемет мүмкіндік алғанын жасырмады.
«БҰҰ-ның Тұрақты даму мақсаттарына қол жеткізуге белсенді жастарды тарту – ХХІ ғасырдағы жаһандық проблемаларды есепке алсақ, қоғам үшін маңызды. Қазіргі алмағайып кезеңде әлеуметтік жауапкершілігі мол ESG көшбасшыларын даярлауға Қазақстан баса назар аударды. Форумның мақсаты – алматылық белсенді жастарды БҰҰ-ның Тұрақты даму мақсаттарының тұжырымдамасымен таныстыру. Сонымен қатар тәжірибе алмасатын, жоба  қорытындыларын, ғылыми жаңалықтар мен зерттеулерді бөлісетін және жаңа идеяларды бірлесіп пысықтайтын алаң құру маңызды. Іс-шарада жастар әлеуметтік және экологиялық проблемаларды шешу жолдарымен таныса алды деп ойлаймын. Корпоративтік сектор мен үкіметтік емес ұйымдардың (ҮЕҰ) сарапшыларынан ТДМ және ESG мәселелері бойынша қосымша білім алып, тәжірибе алмасуға да керемет мүмкіндік туып тұр», – деді AlmaU-дың Тұрақты даму және ESG орталығының  басшысы.
 width= Форум аясында AlmaU студенттері жүргізген зерттеу жұмыстары да таныстырылды. Олар Lehigh университетімен бірлесе жұмыс істеп, Алматы қаласындағы ауаның ластану деңгейін анықтады. Салыстырмалы түрде айтатын болсақ, Алматы ауасы Лос-Анджелес қаласынан да лас. Еліміздегі электостанциялардағы электр қуатының 80%-ы көмірден өңделеді. Әлем тұрғындарының 92%-ы ауаның ластануынан зиян шексе, 3,5 миллион адам кеңседегі лас ауадан көз жұмады екен. Университет студенттері арнайы чип орнатылған құрылғы арқылы Алматы қаласы Бостандық ауданындағы  пәтерлерге зерттеу жұмыстарын жүргізіп көрген.
«Біздің ең бірінші мақсатымыз – Алматы тұрғындарының денсаулығына лас ауаның  қаншалықты теріс әсері барын анықтап, оның шешімін табуға атсалысу.  Егерде біздің ойлап тапқан құрылғы оң нәтиже берсе, онда оны  кеңселер мен үйлерге орнатып, қала халқының денсаулығын жақсартуға үлес қосамыз. Болашақта медициналық университеттер мен экологияға жауапты мекеме қызметкерлерімен бірлесіп, ауаның ластану деңгейін төмендету арқылы халықтың да денсаулығын жақсартуға үлесімізді қосамыз», – дейді AlmaU университетінің 1-курс студенті Умид Аблуллаев.
 width= Университеттің ESG клубының мүшелері тағы бір жүргізген зерттеу жұмысы қоғамдық көліктегі харасмантқа арналған. Студенттер 1-4 курс оқитын қыздар арасында сауалнама жүргізіп, нәтижесінде қыздардың 49%-ы 12-18 жас аралығында, 8,9%-ы 5-12 жасында, 9,7%-ы 18-21 жасында осындай келеңсіз жағдайға кезіккенін айтқан. Сауалнамаға қатысқандардың  34,7%-ы мүлдем мұндай жайтпен кездеспедім, – деп жауап берген. ESG клуб мүшелері алдағы уақытта тек қана AlmaU студенттері арасында емес, осындай келеңсіз жағдайға кезіккен қазақстандық барлық жоғары оқу орындары қыздарының арасында сауалнама жүргізуді жоспарлап отыр. Жастардың айтуынша, мұндай сауланаманы кеңейту қоғамдық дертке айналған харассмант проблемасын ашық айтып, алдын ала қорғану жұмыстарын жүргізу үшін керек екенін жеткізді. Жастар мен осы сала майталмандарының басын қосқан форумда Тұрақты дау мақсаттарын жүзеге асыру жолдары мен  болашағы жайлы тұщымды пікірлер ортаға салынды.  

Нұрболат АДЫРБЕК, 

Алматы қаласы