Сенбі, 28 Қаңтар, 2023

Елорда тұрғындарын үздіксіз азық-түлікпен қамтитын кешен салынып жатыр – Көлгінов

Елорда әкімі Алтай Көлгінов зауыт пен логистикалық орталықтардың құрылысымен танысты. Бұл туралы қала басшысы Instagram-дағы парақшасында жазды.

Әкімнің айтуынша, биыл 10 айда қала экономикасына 1 триллион теңгеден астам жеке инвестиция тартылды.

«Жеке инвестициялар тарту есебінен қалада қажетті бірқатар зауыт пен логистикалық орталықтардың құрылысы жүріп жатыр. Мәселен, өндірістік азық-түлік кешені (нан зауыты, сүт өңдеу зауыты, көкөніс қоймасы), нан-тоқаш, ұн және кондитерлік өнімдерді өндіруге арналған өндірістік кешен, заманауи логистикалық орталық, коммуналдық-қойма және т.б.  Аталған жобаларға арналған инвестицияның жалпы сомасы – шамамен 50 млрд теңге. Бүгін бірқатар зауыт пен логистикалық орталықтардың құрылысымен таныстым.

Мысалы, өндірістік-тамақ кешені нан, сүт өңдеу зауытынан және көкөніс қоймасынан тұрады. Нан зауыты тәулігіне 25 тоннаға дейін өнім шығарса, көкөніс қоймасы 6 тоннаға дейін өнім сақтай алады. Нан зауыты мен көкөніс қоймасын келер жылы пайдалануға беруді жоспарлап отырмыз. Сүт өңдеу зауыты 2024 жылы тәулігіне 100 тоннаға дейін өнім береді.

Азық-түлік мәселесін қамтамасыз ету үшін заманауи логистикалық орталық және коммуналдық қойма секілді жобалардың да маңызы зор. Олар азық-түлікті де, дәрі-дәрмектерді де, сол сияқты өзге де маңызды өнімдерді сақтауға мүмкіндік береді. Екі жобаға арналған жеке инвестициялар сомасы шамамен 32 млрд теңге болды.

Бұған дейінгі инвестициялық кеңесте зауыттар мен логистикалық орталықтарға қолдау білдіргенбіз. Жеке инвестицияларды жұмылдыру есебінен қалада мектептер, медициналық нысандар, спорт орталықтары, жылыжай кешендері, көтерме-тарату орталықтары және т.б. салынып жатыр. Осы жылдың 10 айында қала экономикасына 1 триллион теңгеден астам жеке инвестиция тартылды. 2021-2022 жылдары – 2 триллион 300 млрд теңгеден асты», – деді әкім.

Елорда тұрғындарын үздіксіз азық-түлікпен қамтитын кешен салынып жатыр – Көлгінов

Байқау айқын
Байқау айқын

Ұқсас жаңалықтар

Back to top button