Бейсенбі, 8 Желтоқсан, 2022

Қазақтар мен өзбектер Орталық Азия футболын бірге дамытады

Қазақстан мен Өзбекстан бірлесе отырып Орталық Азия футболын дамытатын болады деп хабарлады turkystan.kz ҚФФ-ға сілтеме жасап.

Ташкенттегі жолдастық матч екі елдің федерациялары арасындағы байланысты одан әрі нығайту үшін маңызды платформаға айналды.

Қазақстан футбол федерациясының президенті Әділет Барменқұлов пен Өзбекстан футбол қауымдастығының бірінші вице-президенті Равшан Ирматов Орталық Азияда футболдың дамуына ықпал ететін үлкен синергияны құру мақсатында ынтымақтастық туралы меморандумға қол қойды.

Құжат федерациялар арасындағы ынтымақтастықты нығайтуға, аймақтағы футболды насихаттауға және дамытуға, сондай-ақ барлық санаттағы ұлттық құрамалардың жолдастық матчтарын ұйымдастыруға және меморандумға қол қойған елдерде өткізілетін халықаралық турнирлерге қатысуға бағытталған.

Меморандумға сәйкес, тараптар жаттықтырушыларды, төрешілерді және футбол мамандарын оқыту бойынша білім беру семинарларын өткізуге, сонымен қатар балалар мен жасөспірімдер футболын дамытуға қолдау көрсетуге және спорттық іс-шаралар бағдарламаларын әзірлеуге ниетті.

«Ең алдымен, бізді осылай құшақ жая қарсы алғандарыңыз үшін алғыс айтқым келеді. Орталық Азиядағы футболды одан әрі дамыту үшін бауырлас халықтың футбол қауымдастығымен ынтымақтасу – біз үшін үлкен мәртебе. Біз үлкен бірлескен тарихымыздың жаңа бетін ашпақпыз. Сондай-ақ, Астанадағы UEFA STEP семинарына өз үлесін қосқан делегацияңызды жібергеніңіз үшін алғысымды білдіремін. Біз әртүрлі футбол конфедерацияларында болсақ та, бізді тарихымыз бай футбол біріктіреді. «Қайрат» пен «Пахтакор» арасындағы матчтардың толық стадиондарда халықты қалай жинағаны есімізде. Алдағы уақытта меморандум аясында екі елдің құрамалары да халықтың назарын аударып, толық стадион жинайтын жолдастық кездесулер өткізетініне сенімдімін. Біз бауырлас елде футболдың қалай дамып жатқанын үлкен қуанышпен көріп отырмыз. Екі елдің ынтымақтастығы ғасырлар бойы жалғасады және елдеріміздің футболына пайда әкеледі деп сенемін», – деп атап өтті ҚФФ президенті Әділет Барменқұлов.

«Ұзақ үзілістен кейін біз ынтымақтастықтың алғашқы қадамдарын жасағанымызға қуаныштымын. Өзбекстан мен Қазақстан өңірлері Орталық Азияда көшбасшылары деп санаймын. Біздің бірлескен жұмысымыз екі елдің футболын дамытуға бағытталатынына сенімдімін. Біз әртүрлі конфедерациялар қатарында болсақ та, біздің құндылығымыз бен футболға деген көзқарасымыз ұқсас деп ойлаймын. Сондай-ақ Қазақстан футбол федерациясына UEFA STEP білім беру семинарына шақырғаны үшін алғыс білдіремін. Бұл – біз үшін үлкен мәртебе», – деді Өзбекстан футбол қауымдастығының бірінші вице-президенті Равшан Ирматов.

Айта кету керек, Өзбекстанда футбол қарқынды дамып келеді және бүгінгі таңда Өзбекстан құрамасы Азиядағы ең мықты командалардың бірі болып саналады. Атап айтқанда, Әлем чемпионатының соңғы іріктеу турнирінде команда өз тобында екінші орын алды.

Сондай-ақ, кездесуде қазақстандық делегация Өзбекстан футбол қауымдастығының кеңсесіндегі футбол мұражайын аралады.

Байқау айқын
Байқау айқын

Ұқсас жаңалықтар

Back to top button