17 жастағы қазақстандық теннисші Түркиядағы турнирдің чемпионы атанды

17 жастағы қазақстандық теннисші Түркиядағы турнирдің чемпионы атанды

Қазақстандық 17 жастағы Аружан Сағындықова Түркияның Анталия қаласында ITF World Tennis Tour W15 турнирінің чемпионы атанды деп хабарлады turkystan.kz ҚазАқпаратқа сілтеме жасап. Team Kazakhstan академиясының түлегі А.Сағындықова қытайлық Ю-Юн Лимен бірге жұптық сында үздік шықты. Қазақстандық-қытайлық жұп финалда ресейліктер, апалы-сіңлілі Анастасия мен Рада Золотареваларды тартысты бәсекеде тізе бүктірді – 7:5, 3:6, 10:4. Аружан жекелей сында да тәп-тәуір өнер көрсетіп, ширек финалға дейін жетті. «Қуанышымда шек жоқ, өйткені ересектер арасындағы ITF жарысында алғашқы титулыма қол жеткіздім. Сондықтан бүгін мен үшін ерекше күн болды. Маған сенім артып, қолдаған Болат Өтемұратов бастаған Қазақстан теннис федерациясына, бапкерім Руслан Мухамедзяновқа алғысымды айтамын», - деді марапаттаудан соң Аружан Сағындықова.