Түркия Президенті Ажар Ғиниятты марапаттады

Түркия Президенті Ажар Ғиниятты марапаттады

Түркия Президенті Ажар Ғиниятты марапаттады
ашық дереккөзі

Денсаулық сақтау министрі Ажар Ғиният Ыстанбұлда өтіп жатқан «Пандемиядан кейін жаһандық денсаулық сақтауды нығайту» тақырыбындағы Дүниежүзілік Түркі медициналық конгресіне қатысты деп хабарлады turkystanz.kz ведомствоның баспасөз қызметіне сілтеме жасап.

Конгрестің басты мақсаты – шетелде тұратын және денсаулық сақтау саласында қызмет етіп жүрген түркі ғалымдарының, Түркиядағы әріптестерінің басын қосу арқылы қатысушы елдердің медицина ғылымын дамыту саласындағы бар әлеуетін арттыру.

Форумның ашылуында Денсаулық сақтау министрлігінің басшысы Түркия Республикасының Президенті Режеп Тайып Ердоған мырзаға, түркі мемлекеттері Ұйымының Хатшылығы мен Түркия Республикасының Денсаулық сақтау министрлігіне конгресс жұмысына қатысуға шақырғаны үшін алғысын білдірді, сондай-ақ түрік халқын басты ұлттық мереке - Республика күнімен шын жүректен құттықтады.

«Біз Түркі мемлекеттері ұйымының алаңында денсаулық сақтау саласындағы әріптестікті одан әрі нығайтуға ерекше мән береміз. 2021 жылы Ыстанбұлда өткен Түркі мемлекеттері ұйымына мүше мемлекеттер басшыларының Саммитінде қабылданған «Түркі көзқарасы-2040» бағдарламасы денсаулық сақтау мәселелерін қамтиды және денсаулықты сақтау біздің елдеріміз үшін басты басымдықтардың бірі екенін тағы бір мәрте көрсетеді», - деп атап өтті А.Ғиният өз сөзінде.

Жаһандық коронавирустың қоғамның барлық салаларына әсерін еске сала отырып, ол денсаулық сақтау саласындағы халықаралық ынтымақтастықтың маңызын атап өтті.

«Біз пандемия кезінде көрсеткен серіктестеріміздің қолдауын бағалаймыз және Түркияға көрсетілген гуманитарлық көмек үшін алғыс айтамыз», - деп атап өтті Қазақстанның Денсаулық сақтау министрі.

«Елдеріміздің тарихи дамуы, денсаулық деңгейі мен денсаулық сақтау жүйесі ұқсас. Жұмыс топтары мен бастамаларға бірігу бізге ортақ мәселелерді шешуге және бірлескен мақсаттарға жетуге мүмкіндік береді. Бұл конгресс жаһандық деңгейде денсаулық сақтауды нығайтуда маңызды рөл атқарады, мамандар арасындағы кәсіби ынтымақтастықты кеңейтеді», - деп түйіндеді Қазақстан Денсаулық сақтау министрлігінің басшысы.

Конгрестің басты оқиғаларының бірі - Режеп Тайып Ердоған мырзаның өзі өткізген қатысушы елдердің Денсаулық сақтау министрлеріне «Медицина тарихына бейілділік» және «Ортақ тарих» марапаттарын тапсыру рәсімі болды.

Қазақстан Республикасы Денсаулық сақтау министрлігінің басшысына Түркия Президентінің қолынан COVID-19 індетімен күреске қосқан үлесі үшін еліміздің медициналық ғылыми қоғамдастығы мен медицина қызметкерлеріне арналған естелік мүсінше табысталды.