Қарағандыда жас жігіт такси жүргізушісін пышақтап кеткен

Қарағандыда такси жүргізушісін өлтірген күдікті тәулік ішінде ұсталды деп хабарлады turkystan.kz Polisia.kz сайтына сілтеме жасап. 27 қазан күні Қарағанды қалалық Полиция басқармасына қарасты Киров полиция бөліміне Учительская көшесінде бірнеше пышақ жарақаты бар 59 жастағы азаматтың мәйіті табылғандығы туралы хабарлама түсті. Оқиға орнына облыстық Полиция департаменті және қалалық Полиция басқармасының жедел-тергеу топтары жіберілді. Полиция қызметкерлерімен жәбірленушінің такси жүргізушісі болып жұмыс істегені анықталды. Аталған факті бойынша Қазақстан Республикасы Қылмыстық кодексінің 99-бабы 1-бөлігіне сәйкес қылмыстық іс қозғалды. Криминалдық полиция қызметкерлерімен жүргізілген жедел-іздестіру және арнайы іс-шаралары барысында аса ауыр қылмыс жасады деген күдікпен 25 жастағы қала тұрғыны ұсталды. Ол жүргізушіге жолақысына келіспеушілік барысында пышақ жарақатын салғаны туралы мойындау көрсетпе белгілерін берді. Кейін күдікті таксиді айдап кетіп, ЖБИ ықшамауданына барар жолдағы темір жол өтпесінің жанына тастап кеткен. Күдікті уақытша ұстау изоляторына қамалды. Тергеу амалдары жүргізілуде.