Астанада күн сайын 90 бала балабақша кезегін толықтырып отыр. Бұл туралы қалалық Білім басқармасының басшысы Қасымхан Сенғазыев мәлім етті, деп хабарлайды ҚазАқпарат.
«Астанада күніне 70-75 сәби дүниеге келеді, күн сайын 80-90 бүлдіршін балабақша кезегіне тұрады. Егер де жекеменшік балабақша ашамын деген кәсіпкерлердің өтініш-тілектерін тыңдамасақ, 2020 жылға дейін балалардың барлығын 100 пайыз балабақшамен қамтамасыз етеміз деген жоспарды орындай алмаймыз»,-деді Қ.Сенғазыев.
Айта кетейік, Ұлттық кәсіпкерлер палатасында өткен жиналыста кәсіпкерлер балабақша ашу үшін мемлекеттік органдар тарапынан қойылатын нормалар мен ережелер өте көп екенін айтқан болатын. Қ.Сенғазыевтың айтуынша, жақында ғана мемлекеттік-жекеменшік әріптестік жүйесі бойынша балабақша ашу үшін 10 жоба конкурсқа салынған екен. Оның тек алтауы мақұлданды, ал қалған төртеуіне ешбір кәсіпкер қызықпаған. Себебі, ол жобалардың құны өте қымбат болып шыққан.