Жұма, 2 Желтоқсан, 2022

Қазақстан мен Сауд Арабиясына тікелей әуе рейстері ашылады

Air Astana Алматы – Медина бағытында, FlyArystan Ақтау – Медина бағыттарында аптасына жиілігі 2 реттен тұрақты рейстер орындайды деп хабарлады turkystan.kz Индустрия және инфрақұрылымдық даму министрлігінің баспасөз қызметіне сілтеме жасап.

Министр Қайырбек Өскенбаев Қажылық және умра министрі Тауфик бен Фаузан бин Мухаммад Аль-Рабиа бастаған Сауд Арабиясының делегациясымен кездесті. Кездесу барысында тараптар екі ел арасындағы әуе тасымалын одан әрмен арттыру және ұшу географиясын кеңейту тұрғысында келіссөз жүргізді.

Министр Қайырбек Өскенбаев Қазақстан мен Сауд Арабиясы арасындағы авиация саласындағы ынтымақтастық артып келе жатқандығын баяндады. Оның айтуынша, қазіргі күнде Үкіметаралық келісім негізінде аталған мемлекеттердің авиациялық билігінің бірлескен жұмысының нәтижесінде қажылық парызын орындаушылар үшін тікелей чартерлік рейстер орындалып жатыр.

«2015 жылдан бастап отандық «SCAT» және саударабиялық «Fly Nas» авиакомпаниялары қажылық сапарға аттанғандар үшін тікелей әуе тасымалын орындауда. Өткен жылы Сауд Арабия тарапы қажылыққа баруға ниет еткен қазақстандықтар үшін 4 мың квота бөлді. Бес парыздың бірін орындаушыларды тасымалдау кезінде Медина және Джиддаға Астана, Алматы, Шымкент және Ақтаудан 19 рейс ұйымдастырылды», – деді ведомство басшысы.

Бүгінде SCAT әуекомпаниясы жылдың барлық мерзімінде жиілігі аптасына 1-2 рет Алматы және Шымкенттен Медина, Джидда бағытында тұрақты чартерлік әуе тасымалын орындауда. Сонымен қатар 2022-2023 жылдардағы күзгі және қысқы навигациялық маусымда бірқатар отандық әуе компаниялары тұрақты жолаушылар тасымалын ұйымдастыруды жоспарлап отыр. Атап айтқанда, «Air Astana» Алматы – Медина бағытында, «Fly Arystan» Ақтау – Медина бағыттарында аптасына жиілігі 2 реттен тұрақты рейстер орындамақ.

Қазақстан тарапы Сауд Арабиясының азаматтық авиация билігі басшыларымен келіссөздер жүргізуде. Осыған орай, биылғы 29 қыркүйекте Канаданың Монреаль қаласында өтетін ICAO-ға қарасты Азаматтық авиация ұйымы Халықаралық Ассамблеясының 41-сессиясы аясында екі мемлекет арасындағы өзара түсіністік туралы меморандумға қол қойылады деп жоспарланған. Оның шеңберінде әуекомпаниялар жолаушылар тасымалын аптасына 4-тен 8-ге дейін арттыру көзделіп отыр. Бұл Қазақстандағы «ашық аспан» режимі аясында жүзеге асырылмақ.

Өз кезегінде Тауфик Фаузан Аль-Рабиа министрге жан-жақты қолдауы үшін алғысын білдіріп, елдер арасындағы тікелей рейстердің ашылуы өзара қарым-қатынасты нығайтуға елеулі үлес қосатынын атап өтті. Сондай-ақ ол әуе тасымалын орындауға саударабиялық авиакомпаниялар да мүдделі екендігін жеткізді.

«Сіздің бастамаңызбен ұсынылған мемлекеттер арасындағы әуе тасымалын одан әрмен арттыру мен ұшу географиясын кеңейту бойынша екі елдің әуе билігі өкілдерінің келіссөздері жемісті нәтижесін беруде. Жақын арада тікелей әуе қатынастары қайта жанданатын болады», – деді Сауд Арабиясының Қажылық және умра министрі.

 

Байқау айқын
Байқау айқын

Ұқсас жаңалықтар

Back to top button