11 жастағы қазақ баласы Грузиядағы турнирдің жүлдегері атанды

11 жастағы қазақ баласы Грузиядағы турнирдің жүлдегері атанды

Тбилисиде (Грузия) үстел теннисінен жасөспірімдер арасында WTT Youth Contender турнирі өтіп жатыр. Байрақты бәсекеде ел намысын қорғаған түркістандық Марлен Жұмағұл күміс медаль иеленді деп хабарлады turkystan.kz Отырар басылымына сілтеме жасап. Халықаралық турнирде әртүрлі жас топтарында Қазақстанмен қатар Армения, Әзербайжан, Бельгия, Египет, Грузия, Голландия, Гонконг, Үндістан, Иран, Йемен, Катар, Тайбэй, Сауд Арабиясы, Мексика, Швеция, Біріккен Араб Әмірліктері, Украина, Өзбекстан спортшылары өнер көрсетіп жатыр. Тартысты турнирде Түркістан қаласының тумасы, 11 жастағы Марлен Жұмағұл өз шеберлігін көрсетіп, күміс медальді жеңіп алды. Марлен Түркістан облысы Дене шынықтыру және спорт басқармасына қарасты Түркістан қалалық №2 балалар мен жасөспірімдер спорт мектебінде тәлім алады. Спорт мектебін Әнуар Амантайұлы Сәрсенбаев басқарады. Тбилисиде Марленнің ойын өрнегі көпшілік көңілінен шықты. Оның көрсеткішіне назар аударсақ, 3 кіші топта Моххамед Альмусаибты (БАӘ) 3:0 есебімен, 1/4 финалда Мате Гамбарашвилиді (Грузия) 3:1 есебімен, жартылай финалда Юсеф Альхавайды (БАӘ) 3:2 есебімен жеңді. Ал бірінші орын үшін болған кездесуде ирандық Фараз Шакиба басымдық байқатты. Сондай-ақ аталған бәсекеде тағы бір түркістандық Рамазан Нәзір өз өнерін паш етіп, ширек финалға дейін жетті. Енді 23-25 қыркүйек аралығында турнирде Қазақстан құрамасы сапында қыздар ойнайды.