Бейсенбі, 29 Қыркүйек, 2022

Елордалық дәрігерлер 5 жасар науқасқа инновациялық ота жасады

Бес жасар бүлдіршін екі жақты микротиямен және құлақ каналының атрезиясымен дүниеге келген. Үш жасында ата-анасы оған арнайы аппарат сатып алған. Оны бандаж арқылы сәби шағынан киіп келеді. Сондықтан бала операция жасауға болатын жасқа жеткенге дейін бойындағы дамуында қиындық болмады. Қазір ол уақытша аппаратсыз-ақ жүре алады, өйткені елордалық дәрігерлер балаға МӘМС аясында ота жасады деп хабарлады turkystan.kz қала әкімдігінің ресми сайтына сілтеме жасап.

Сүйек өткізгіштік аппаратын имплантациялау операциялары Қазақстанда осы жылы медициналық сақтандыру аясында жүргізіле бастады.

Бұған дейін №2 көпбейінді қалалық балалар ауруханасының лорхирургтері де мұндай операциялар жүргізген, бірақ стационарға импланттар гуманитарлық көмек аясында түскен. Операция инновациялық емдеу әдістеріне жатады және жоғары технологиялық медициналық қызмет болып саналады.

«Мұндай операцияға түсетін балалар санатының бірі – микротия және атрезиясы бар науқастар. Бұл екі түрлі диагноз, бірақ олар ылғи да бірге жүреді. Микротия, бұл –  жүрекшенің болмауы немесе дамымауы. Атрезияда құлақ арнасы күрт тарылған немесе мүлдем жоқ, бұл – туа біткен ақау. Бұл осындай диагнозы бар балалардың аналары үшін қиын жағдай», – деп атап өтті №2 көпбейінді қалалық балалар ауруханасының лор бөлімшесінің меңгерушісі Арман Әбілев.

«Енді МӘМС аясында біз осындай операцияларды тұрақты түрде жасайтын боламыз. Бұл операция шамамен 4 жастан асқан кезде жасалады.

Операцияның маңызы – дыбыс баланың бас сүйегіне импланттың арқасында сүйектер арқылы беріледі. Діріл пайда болады, ол ішкі құлаққа өтеді және бала еститін болады», – деп қосты лор хирургі.

Айта кетсек, балаға бұрын Қазақстанның жеке клиникаларының бірінде үндістандық дәрігер операция жасаған. Операция барысында есту арнасын табиғи жол арқылы ашуға тырысқан. Бірақ мұндай жағдайда бәрі сәтті бола бермейді. Әлемдік тәжірибеде мұндай операциялардан бас тартылып жатыр.

Қазір науқас операциядан кейінгі қолдау терапиясын алады. Жақында бала шығарылып, атыраулық отоларингологтардың бақылауы үшін үйіне жіберіледі. Шамамен бір айдан кейін имплантқа сөйлеу процессоры қосылады. Оны әр бес жыл сайын өзгерту керек, бірақ импланттың өзі қайта орнатуды қажет етпейді.

 

Back to top button