Бейсенбі, 29 Қыркүйек, 2022

Мемлекеттік кеңесші Ерлан Қарин сайлауға қатысты пікір білдірді

Мемлекет басшысының Президент сайлауын 20 қарашаға белгілеу туралы Жарлығы – жаңа электоралды циклдың бастамасы. Мемлекеттік кеңесші Ерлан Қарин саяси науқан туралы ой бөлісті деп хабарлады turkystan.kz.

«Президент сайлауын өткізу туралы бастама кейінгі үш жылдағы саяси жаңғыру бағытына толыққанды сай келеді. Конституциялық реформа билік тармақтары арасындағы өзара қарым-қатынастың жаңа, неғұрлым теңдестірілген тәртібін бекітті. Жаңа үлгіні іске қосу үшін мемлекеттің Президент, Парламент, Үкімет, мәслихаттар сияқты шешуші институттарын қоса алғанда бүкіл саяси жүйені қайта бастау қажет», – дейді Мемлекеттік кеңесші.

Қазақпараттың жазуынша, мемлекеттік кеңесші бұл ретте сарапшылар мен саясатта алдағы электоралды науқан туралы пікірталас көптен бері өрбіп келе жатқанына да назар аударды. Сарапшылардың бірқатары мерзімнен бұрын сайлау өткізу қажеттігі туралы көктемде айтқанына тоқталды.

«Қазіргі сайлаудың ерекшелігі – алдағы сайлау науқаны кестесінің алдын ала жария етілуінде болып отыр. Қасым-Жомарт Тоқаев Президент сайлауы туралы тиісті Жарлыққа қол қойғаннан бір ай бұрын құлаққағыс етті. Ал бұған дейін мерзімінен бұрын өткен сайлаулардың барлығы олардың күні көрсетілген Жарлыққа қол қойылған күні мәлім болып келген еді. Бұл уақыт алдағы науқанның қоғамда кеңінен талқылануына ғана емес, әлеуетті қатысушыларды алдын ала дайындауға да жеткілікті болды. Заң бойынша сайлау күні белгіленгеннен кейін екі ай ішінде өтеді, бірақ іс жүзінде науқан үш айға созылады.

Қоғамның бірлігі, мемлекеттің тұрақтылығы, елдің кез келген ішкі және сыртқы мәселелерге дұрыс жауап бере алу қабілеті тек қана теңдестірілген және тұрақты саяси жүйе жағдайында ғана қамтамасыз етіледі. Сондықтан, геостратегиялық турбуленттік ушыға түскен кезде алдағы Президент сайлауы біздің елімізді кең көлемді әлеуметтік-экономикалық реформалардың жаңа кезеңі қарсаңында біріктіретін ең маңызды факторға айналуы тиіс», – деді Ерлан Қарин.

 

Ұқсас жаңалықтар

Back to top button