Дүйсенбі, 28 Қараша, 2022

АҚШ-қа сапар: Қасым-Жомарт Тоқаев екі күнде 27 кездесу өткізді

Президент Қасым-Жомарт Тоқаевтың АҚШ-қа жасаған сапарының екінші күні аяқталды. Бұл туралы Президенттің баспасөз хатшысы Руслан Желдібай Facebook-тағы парақшасында жазды деп хабарлады turkystan.kz.

20-қыркүйектің басты оқиғасы – Біріккен Ұлттар Ұйымы Бас Ассамблеясы 77-сессиясының Жалпы дебаты болды. Қасым-Жомарт Тоқаев аталған шарада сөз сөйлеп, бірнеше жаһандық өзекті мәселені көтерді.

«Президент өз сөзінде бұрыннан қалыптасқан әлемдік қауіпсіздік жүйесін қалпына келтірудің, территориялық тұтастықты сақтаудың, елдердің егемендігін құрметтеудің маңыздылығын атап өтті.

Сондай-ақ Мемлекет басшысы Азық-түлік жөніндегі жаһандық саммитке де қатысып, сөз сөйледі. Президент әлемдік нарықтағы Қазақстанның рөлін арттыруға бағытталған бірнеше ұсыныс айтты. Ол еліміздің астық және басқа азық-түлік түрлерін тұрақты жеткізуіне, Транскаспий халықаралық көлік бағытын дамытуға қатысты болды.

Жалпы, биылғы шетелдік сапарларда Президент ең жиі көтерген мәселенің бірі – көлік-логистика мәселесі. Яғни, бүгінгі күрделі геосаяси жағдайға қарамай, отандық тауарларды әлемдік нарыққа шығарудың жаңа жолдары үнемі қарастырылып жатыр. Себебі, бұл – ел экономикасына тікелей ықпал ететін маңызды фактор» деп жазды Руслан Желдібай.

Президенттің баспасөз хатшысының айтуынша, бұдан бөлек, бүгін Мемлекет басшысы БҰҰ Бас хатшысы Антониу Гутерришпен, Еуропалық Кеңестің Президенті Шарль Мишельмен, Еуропалық комиссия Президенті Урсула фон дер Ляйенмен, Австрия Президенті Александр Ван дер Белленмен, Халықаралық Қызыл Крест комитетінің Президенті Питер Маурермен кездесіп, екіжақты мәселелерді талқылады. Сондай-ақ Иордания Королі ІІ Абдалламен, Қатар Әмірі Тамим бин Хамад Әл Танимен әңгімелесті.

Жалпы, Президент соңғы екі күнде 27 кездесу өткізіп, 3 ірі шараға қатысты.

 

Байқау айқын
Байқау айқын

Ұқсас жаңалықтар

Back to top button