Сейсенбі, 29 Қараша, 2022

Балабақша тәрбиешілері қағазбастылықтан арылатын болды

Оқу-ағарту министрі Асхат Аймағамбетов балабақша тәрбиешілері толтыруға міндетті құжаттардың санын азайтатын бұйрыққа қол қойды деп хабарлады turkystan.kz.

«Бұған дейін Президент Қасым-Жомарт Кемелұлы Тоқаев мұғалімдерді қызметіне тән емес функциялардан босату міндетін қойған болатын. Мемлекет басшысы қол қойған «Педагог мәртебесі туралы» заң осы бағытта қажетті нормаларды бекітіп, ауқымды жұмыстарды жүргізуге мүмкіндік берді. Осы жұмыстың шеңберінде балабақша тәрбиешілері толтыруға міндетті құжаттардың санын азайтатын бұйрыққа қол қойдым» деп жазды министр.

Оның айтуынша, 2020 жылы орта, техникалық және кәсіптік білім беру деңгейіне де осындай тізім бекітілген. Сол бұйрық арқылы мектеп пен колледж мұғалімдерінің есеп тапсыруы қатаң шектелген. Мысалы, мектеп мұғалімі күн сайын екі құжат қана толтыруы керек: мектеп журналына (электронды) баға қою және сабақ жоспары.

«Алайда, мектепке дейінгі білім беру деңгейінде мұндай тізім реттелмегендіктен көптеген құжат проблемасы болды. Олардың тізімі балабақша басшылығының көзқарасы мен маңыздылығын түсінуге қатысты болды» деп жазды Асхат Аймағамбетов фейсбуктегі парақшасында.

Енді қол қойылған бұйрыққа сәйкес тәрбиеші тек мынадай құжаттарды ғана толтырады:

1) оқу жылына арналған перспективалық жоспар (жылына бір рет толтырылады);

2) тәрбие-оқу процесінің циклограммасы (бір аптаға толтырылады);

3) диагностиканың (бастапқы, аралық, қорытынды өлшеулердің) нәтижелері бойынша оқу жылына арналған баланың жеке даму картасы, ол қажеттілігіне қарай толтырылып, жүргізіледі.

Енді мектепке дейінгі білім беру деңгейі бойынша министрлік айқындаған нақты тізбе бар. Сондай-ақ «Педагог мәртебесі туралы» заңда және Әкімшілік кодексте жазылған басқа да құжаттарды талап етуге жауапкершілік қарастырылған және айыппұл түрінде әкімшілік жауапкершілікке тартатын органдар да бар.

Осы ретте Оқу-ағарту министрі жауапкершілікке тарту кімнің құзырында болатынын түсіндіріп берді.

Педагогтерден шектен тыс есепті немесе қызметтік міндеттеріне жатпайтын ақпаратты талап ету фактілері бойынша өтініш түскен кезде Оқу-ағарту министрлігі білім саласындағы сапаны қамтамасыз ету комитетінің аумақтық департаменттері құқық бұзғаны үшін жоспардан тыс тексеруді ҚСжАЕК органдарында тіркейді және оны білім беру ұйымына барып немесе бармай-ақ жүргізеді.

Құқық бұзу фактісін дәлелдейтін материалдар:

– жазбаша тапсырмалар немесе олардың көшірмелері, бұйрықтардың көшірмелері, есеп беру бланкілерінің көшірмелері және педагогтен есеп беруді немесе ҚР білім беру саласындағы заңнамасында көзделмеген мәліметтерді талап етуді растайтын басқа да материалдар.

«Егер құқықбұзушылыққа алғаш рет жол берген адам өз кінәсін мойындаса, комитет және аумақтық орган әкімшілік құқықбұзушылық туралы хаттама толтырмай, кінәлі адамға ескерту туралы қаулы шығарады. Ал адам қайтадан құқық бұзса, оған қатысты әкімшілік құқықбұзушылық туралы хаттама толтырылады.

Әкімшілік айыппұл 20 АЕК-тен 120 АЕК-ке дейін. Мектеп пен балабақша педагогтеріне қолайлы жағдай жасауға бағытталған талаптар сақталуға тиіс. Әріптестерімнен дер кезінде тиісті шара қабылдау үшін осындай фактілер болған жағдайда ол туралы хабарлауын сұраймын» деп жазды А.Аймағамбетов.

Сонымен қатар министр бұған дейін жауапты тұлғалар заң бұзғаны, артық есепті және басқа да құжаттарды талап еткені үшін жауапқа тартылғанын еске салды.

«Білім беру ұйымдарының басшыларынан тағы да заңды қатаң сақтауды және артық есепті талап етуге жол бермеуді сұраймын», – делінген жазбада.

Байқау айқын
Байқау айқын

Ұқсас жаңалықтар

Back to top button