«Жүрек айниды»: Атырау тұрғындары жағымсыз иіске шағымданды

«Жүрек айниды»: Атырау тұрғындары жағымсыз иіске шағымданды

Атырауда бірнеше түн қатарынан жағымсыз иіс жайлап, тұрғындардың көпшілігі бас ауруына, әлсіздікке, жүрек айнуына шағымданды. Осыған байланысты облыстық Экология департаменті Атырау мұнай өңдеу зауытын жоспардан тыс тексеруді бастады деп хабарлады turkystan.kz Ақ Жайық басылымына сілтеме жасап. – Бұл - мұнай өнімдерінің иісі. Біз Атырау мұнай өңдеу зауытын жоспардан тыс тексеруді бастадық, қазір біздің қызметкерлер зауытта. Бұдан басқа, зертхана желдің бағыты бойынша атмосфералық ауаны бақылайды. Ал жел қазір оңтүстік-батыс, яғни зауыт жақтан соғып тұр, - деп түсіндірді Экология департаментінің басшысы Әлібек Бекмұхаметов. Тексеру қаншалықты тиімді болады, бастысы, түндеріміз жағымсыз иіссіз тыныш болатындай нәтиже бере ме, жоқ па, белгісіз. Өйткені қала тұрғындары ауаны ластайтын әлеуетті көздерге – кәсіпорындарға қанша мәрте тексеру жүргізілгенінен жаңылысып қалды. Ал қалада ауаны әлі ластап жатыр. Еске салсақ, бір ай бұрын департамент Атырау мұнай өңдеу зауытына профилактикалық бақылау жүргізіп, жалпы сомасы 5 миллион теңгеден астам заңбұзушылықтарға айыппұл салған болатын. Атап айтқанда, механикалық тазарту құрылғылары аумағында булану кезінде қаланың атмосфералық ауасына теріс әсер ететін ластаушы заттар бөлінетін ашық типті тұнбалары бар су қоймалары мен тоғандар бар екені, «АМӨЗ» ЖШС 2021-2023 жылдарға арналған қоршаған ортаны қорғау іс-шаралар жоспарының қоршаған ортаға эмиссияларға қатысты тармақтарының бірін орындамағаны және т.б. анықталды.