جاڭالىقتارجاھانقوعام

تۇركيادا تۇنگى كلۋبقا وق جاۋدىرعان وزبەكستان نەمەسە قىرعىزستان ازاماتى بولۋى مۇمكىن

كلۋبقا اياز اتانىڭ كيىمىن كيگەن بەلگىسىز ەكى ادام كوپشىلىككە شابۋىل جاساعان. عيماراتتا 800-گە جۋىق ادام بولعان كورىنەدى. قايعىلى وقيعا ورنىندا 35 ادام قازا تاۋىپ، تاعى 40 ادام جارالانعان.

الايدا سوڭعى مالىمەت بويىنشا، كلۋبتا 39 ادام اجال قۇشىپ، 69-ى جارالانعاندىعى انىقتالدى. مارقۇمداردىڭ 16-سى – شەتەلدىك. اتىس كەزىندە شوشىنعان ادامداردىڭ كەيبىرەۋى بوسفور بۇعازىنا سەكىرىپ كەتكەن. ىستامبۇل گۋبەرناتورى شابۋىلدى لاڭكەستىك ارەكەت دەپ اتادى. بۇعان دەيىن اقپارات قۇرالدارى قاسكويدىڭ كوزى جويىلدى دەپ حابارلاعان. الايدا تۇركيانىڭ ىشكى ىستەر ءمينيسترى بۇل اقپاردى راستاعان جوق. قازىر كۇشتىك قۇرىلىم وكىلدەرى قاسكۇنەمدى ىزدەستىرىپ جاتىر.

ىستامبۇلداعى لاڭكەستىك وقيعادا قازا تاپقانداردىڭ سانى ارتىپ جاتىر. تۇركيا ىشكى ىستەر ءمينيسترى سۇلەيمان سويلۋ قاندى شابۋىلدان 39 ادام اجال قۇشىپ، 69-ى جاراقات العانى جونىندە حابارلادى. ال كۇشتىك قۇرىلىمدار لاڭكەستى قۇرىقتاۋ بويىنشا ەل ىشىندە كەڭ اۋقىمدى وپەراتسيا باستادى.
 سۇلەيمان سويلۋ، تر ىشكى ىستەر ءمينيسترى:
– 39 ادام قازا تاپتى. قازىرگى تاڭدا 21 ازاماتتىڭ جەكە باسىن انىقتادىق. تاعى 18-ىنە قاتىستى انىقتاۋ جۇمىستارى جۇرگىزىلىپ جاتىر. ولاردىڭ 16-سى شەتەل ازاماتتارى. ال 69 جارالى اۋرۋحانالاردا مەديتسينالىق كومەك الۋدا. 4 كىسىنىڭ جاعدايى وتە اۋىر دەپ باعالانۋدا. ىستامبۇلداعى لاڭكەستىك ارەكەت سالدارىنان زارداپ شەككەندەر اراسىندا قازاقستان ازاماتتارى جوق. بۇل تۋرالى ەلىمىزدىڭ سىرتقى ىستەر مينيسترلىگى حابارلادى. قازىر جەرگىلىكتى ديپلوماتتار قوسىمشا اقپارات الۋ ماقساتىندا قۇقىق قورعاۋ ورگاندارىمەن جۇمىس جۇرگىزىپ جاتىر. اتاپ ءوتۋ كەرەك، بىلتىر تۇركيادا 28 ءىرى تەررورلىق اكت تىركەلدى. ال بۇگىنگى ىستامبۇلدىڭ تۇنگى كلۋبىنداعى قاندى شابۋىل 2017 جىلدىڭ العاشقى لاڭكەستىك وقيعاسى بولىپ وتىر. جەرگىلىكتى تۇرعىندار، جاڭا جىل قايعىلى وقيعامەن باستالعانىنا وكىنىش ءبىلدىرىپ، قازا تاپقان وتباسىلارعا كوڭىل ايتۋدا.
دجەميل گيۋمۋش، ىستامبۇل قالاسىنىڭ تۇرعىنى:

– 2017 جىلدىڭ العاشقى ساعاتىندا تۇركيادا كەزەكتى تەررورلىق وقيعا بولدى. ونداعان ادام قازا تاپتى، جارالىلار دا جەتەرلىك. نەگىزى 2015 جىلدان بەرى ەلىمىزدە لاڭكەستىك شابۋىلدار كۇرت جيىلەدى. قۇددى ءبىر بارلىق تەررورلىق ۇيىمدار تۇركياعا جابىلىپ جاتقانداي اسەر قالدىرادى. البەتتە، بۇل قايعىلى وقيعالاردان حالىقتىڭ جۇرەگى شايىلىپ، بويلارىن ۇرەي بيلەپ الدى. بۇل جاقسىلىقتىڭ نىشانى ەمەس. كۇنى كەشە ىستامبۇل مۋنيتسيپاليتەتى جاڭا جىل قارساڭىندا قالاداعى قوعامدىق ورىندار مەن ساۋدا ورتالىقتارىندا قاۋىپسىزدىك شارالارىن كۇشەيەتىنىن مالىمدەپ، تۇرعىنداردى قۇلاعدار ەتكەن. بىراق قوعامدىق ءتارتىپ كۇشەيگەنىنە قاراماستان قاسكويلەر ايلانىڭ سان ءتاسىلىن پايدالانىپ، قوي تەرىسىن جامىلعان قاسقىرلارداي جاڭاجىلدىق كەشكە سانتا كلاۋس بولىپ كەلىپ، بەيكۇنا جانداردى جايپاپ سالدى. قازىر الەم ەلدەرى بۇل جانتۇرشىگەرلىك شابۋىلدى قاتاڭ ايىپتاپ، قايعى جۇتقان تۇرىك حالقىنا كوڭىل ايتىپ جاتىر.

الدى الا مالىمەتتەر بويىنشا تۇنگى كلبۋقا وق جاۋدىرعان قاسكوي وزبەكستان نە قىرعىزستان ازاماتى بولۋى مۇمكىن.

Back to top button