جاڭالىقتارقوعام

«قازينۆەستبانك» جابىلدى

قازاقستاندا تاعى ءبىر بانك ءوز قىزمەتىن توقتاتتى. «قازينۆەستبانك» اكتسيونەرلىك قوعامى ليتسەنزياسىنان ايىرىلدى. بۇل تۋرالى بۇگىن ۇلتتىق بانكتىڭ ءباسپاسوز قىزمەتى مالىمدەمە تاراتتى. ەكىنشى دەڭگەيلى بانك قارجى وپەراتسيالارى جانە باعالى قاعازدار نارىعىندا وزگە دە قىزمەتتەر جۇرگىزۋدەن شەتتەتىلدى دەپ حابارلايدى astanatv.

ۇلتتىق بانك الداعى كۇندەرى زاڭنامادا بەلگىلەنگەن تارتىپپەن اتالعان بانكتىڭ قىزمەتىن ماجبۇرلەپ توقتاتۋ نەمەسە تاراتۋ تۋرالى سوتقا ءوتىنىش جولداماق. قازاقستان رەسپۋبليكاسى ۇلتتىق بانكى باسقارماسىنىڭ 2016 جىلعى 26 جەلتوقسانداعى № 291 قاۋلىسىنا سايكەس «قازينۆەستبانك» اق «قازاقستان رەسپۋبليكاسىنداعى بانكتەر جانە بانك قىزمەتى تۋرالى» قازاقستان رەسپۋبليكاسى زاڭىنىڭ 48-بابى 1-تارماعىنىڭ «ۆ» تارماقشاسىندا كوزدەلگەن نەگىزدەر بويىنشا، تولەم جانە اۋدارىم وپەراتسيالارى بويىنشا شارتتىق مىندەتتەمەلەردى ۇنەمى (قاتارىنان كۇنتىزبەلىك ون ەكى اي ىشىندە ءۇش جانە ودان كوپ رەت) تيىسىنشە ورىنداماعانى ءۇشىن 2008 جىلعى 21 ناۋرىزداعى № 221 ليتسەنزيادان 2016 جىلعى 27 جەلتوقساننان باستاپ ايىرۋ تۋرالى شەشىم قابىلداندى.

» سالىمشىلاردان دا مازا كەتكەن. قارجىسىنا الاڭداعان تۇتىنۋشىلار بۇگىن دە بانككە كەلىپ جاتتى. مەنەدجەرلەر اقپاراتتان بەيحابار. كەشە سايتتان قاراپ وتىرىڭىزدار، سوندا بارلىق مالىمەت بار دەپ قايتارعان. بۇگىن امالسىزدان الاڭداپ، تاعى دا كەلدىم. ءبارىبىر سول جاۋاپتى الدىم. ءوزىمىز بىلمەيمىز، ەرتەڭ كەلىڭىز دەپ شىعارىپ سالدى. بۇل وتكەن جۇمادان بەرى جالعاسىپ كەلەدى. ال جەكە تۇلعالار بانكتەگى سالىمدارىنا الاڭداماۋىنا بولادى. سەبەبى قارجى ينسيتۋتى دەپوزيتكە مىندەتتى كەپىلدىك بەرۋ جۇيەسىنىڭ قاتىسۋشىسى. بۇگىن قور وكىلدەرى «قازينۆەستبانك» كليەنتتەرىنە قاراجاتتى قايتارۋ ءتارتىبىن ءتۇسىندىردى. بانكتى ماجبۇرلەپ تاراتۋ تۋرالى سوت شەشىمى شىققان جاعدايدا، 14 كۇننەن سوڭ سالىمشىلار اقشاسىن قايتارا باستايدى. ونى ەكىنشى دەڭگەيلى بانكتەردىڭ ءبىرى جۇرگىزبەك. بۇل كەپىلدىكتىڭ ەڭ جوعارى مولشەرى ۇلتتىق ۆاليۋتاداعى دەپوزيتتەر بويىنشا – 10 ميلليون تەڭگە، ال شەتەل ۆاليۋتاسىنداعى دەپوزيتتەر بويىنشا – 5 ميلليون تەڭگە.

كۋانىشبەك ءابجانوۆ، قازاقستان دەپوزيتتەرگە كەپىلدىك بەرۋ قورى توراعاسىنىڭ ورىنباسارى:

-دەپوزيتتەرگە كەپىلدىك بەرۋ قورى بانك-اگەنت ارقىلى جۇمىس ىستەيتىن بولادى. سالىمشى اتالعان بانكتىڭ جاقىن جەردەگى بولىمشەسىنە كەلىپ، ءوتىنىش جازادى. ارىز تۇسكەن سوڭ بەس جۇمىس كۇنى ىشىندە كەپىلدەندىرىلگەن وتەماقى تولەنەدى. وتەماقى تەك سالىمشىنىڭ نەگىزگى سومماسىنا عانا بەرىلەدى. بارلىق سۇراقتار بويىنشا «جەدەل جەلى» تەلەفونىنا جانە ۇلتتىق بانككە حابارلاسىپ، ءوتىنىش جاساۋعا بولادى.

Back to top button