Елордада карантин жеңілдетіледі
Нұр-Сұлтан қаласының Бас мемлекеттік санитариялық дәрігерінің орынбасары Жанна Пралиева елордада коронавирус инфекциясының профилактика шараларын жеңілдететін қаулыға қол қойды деп хабарлады turkystan.kz.
Маска тағу ұсынылады:
- адамдар көп жиналатын орындарға (автовокзалдар, сауда-ойын-сауық орталықтары, сауда үйлері, жабық базарлар, концерт залдары, театрлар, кинотеатрлар, халыққа қызмет көрсету орталықтары (ХҚКО), банктер, стадиондар және басқа да спорттық құрылымдары және т. б.) барған жағдайда;
- ұйымдасқан ұжымдарға барған кезде;
- сондай-ақ қалалық қоғамдық көлікте жол жүрген кезде.
Бұған қоса Нұр-Сұлтан қаласының Бас мемлекеттік санитариялық дәрігерінің орынбасары мемлекеттік мекемелер мен бизнеске мынандай міндеттер жүктеді:
- тұрғындар арасында коронавирус инфекциясына қарсы уақтылы вакцинация және ревакцинация бойынша ақпараттық-түсіндіру жұмыстарын жүргізу;
- адамдар көп жиналатын объектілерде, оның ішінде қоғамдық көлікте дезинфекциялау іс-шараларын жүргізу, желдету және ауаны баптау жүйелерінің үздіксіз жұмыс істеуі және желдету режимін сақтау жөніндегі жұмыстарды ұйымдастыру.
Ал Нұр-Сұлтан қаласында шектеу шараларын енгізу туралы Нұр-Сұлтан қаласының Бас мемлекеттік санитарлық дәрігерінің 2022 жылғы 21 шілдедегі № 8 қаулысының күші жойылды.
Соңғы күндері Қазақстанда COVID-19 жұқтырудың күнделікті көрсеткіші төмендеді. Атап айтқанда, өткен тәулікте Нұр-Сұлтанда COVID-19 инфекциясын 178 адам жұқтырғаны анықталды. Елорда 12 тамызда «жасыл» аймаққа өтті.