قىركۇيەكتەن باستاپ ءار وتباسىنىڭ تسيفرلىق كارتاسى بولادى

ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا «تسيفرلىق وتباسى كارتاسى» جوباسى بويىنشا كەڭەس وتكىزدى. سونداي-اق ونى 2022 جىلدىڭ 1 قىركۇيەگىنەن باستاپ پيلوتتىق ەنگىزۋ تۋرالى شەشىم قابىلداندى دەپ حابارلادى turkystan.kz ulysmedia.kz-سىلتەمە جاساپ.

وتباسىنىڭ تسيفرلىق كارتاسى – مەملەكەتتىك كەپىلدىكتەر بويىنشا دەربەستەندىرىلگەن وتباسىنىڭ بازاسى. ول ءاربىر وتباسىنىڭ قۇرامى مەن ءال-اۋقات دەڭگەيىنە قاراي مەملەكەتتىك كەپىلدىك تۇرلەرىن الۋ قۇقىعىن جۇزەگە اسىرۋعا مۇمكىندىك بەرەدى.

ماسەلەن، ءبىر جاسقا تولماعان بالاسى بار وتباسى بالا تۋى بويىنشا بەرىلەتىن جاردەماقى الۋعا قۇقىلى. كامەلەت جاسقا تولماعان ءتورت جانە ودان دا كوپ بالاسى بار وتباسى بالا 18-گە تولعانشا اي سايىن جاردەماقى الادى. مۇگەدەك بالا تاربيەلەپ وتىرعان وتباسى مۇگەدەكتىك بويىنشا بەرىلەتىن جاردەماقى الا الادى. وسىنداي مىسالدار وتە كوپ.

وتباسىنىڭ تسيفرلىق كارتاسىن ەنگىزۋ مەملەكەت تاعايىنداعان جاردەماقىلاردى پرواكتيۆتى فورماتتا، ياعني تولەم الۋشىنىڭ ءوتىنىشىن كۇتپەي بەرۋدى كوزدەيدى.

وتباسىنىڭ تسيفرلىق كارتاسىنىڭ جۇمىس الگوريتمى كەلەسى تاسىلمەن جۇزەگە اسىرىلادى – مەملەكەتتىك كەپىلدىك الۋعا قۇقىعى بار وتباسىنا ەڭبەك مينيسترلىگىنەن SMS-حابارلاما جولدانادى. وندا ازاماتتىڭ مەملەكەتتىك كەپىلدىك الۋى مۇمكىن ەكەنى جازىلعان. بۇدان بولەك، SMS-حابارلامادا ازاماتقا مەملەكەتتىك كەپىلدىكتى پرواكتيۆتى فورماتتا تاعايىنداۋعا كەلىسۋ نەمەسە كەلىسپەۋ قۇقىعى بەرىلەدى. ەگەر ازامات كەلىسكەن جاعدايدا، وندا وعان جاردەماقى تاعايىندالادى. ول كەيىن تولەم الۋشىنىڭ شوتىنا تۇسەدى.

جينالىس بارىسىندا ورتالىق مەملەكەتتىك ورگانداردىڭ، جەرگىلىكتى اتقارۋشى ورگانداردىڭ جانە «ازاماتتارعا ارنالعان ۇكىمەت» كەاق وتباسىنىڭ تسيفرلىق كارتاسىن ىسكە قوسۋعا دايىندىعى تىڭدالدى.

جينالىس قورىتىندىسى بويىنشا 1 قىركۇيەكتەن باستاپ وتباسىنىڭ تسيفرلىق كارتاسىن جەكەلەگەن مەملەكەتتىك كەپىلدىك تۇرلەرى بويىنشا پيلوتتى تۇردە جۇزەگە اسىرۋ تۋرالى شەشىم قابىلداندى.

 

ۇقساس جاڭالىقتار

Back to top button