وكىنىشكە تولى ءومىر. ايەلدەر كولونياسى

ەلىمىز بويىنشا جالعىز قاتاڭ رەجيمدەگى ايەلدەر كولونياسى شىمكەنتتە ورنالاسقان. بۇرىن بۇل جەر ات قورا بولعان، كەيىنىرەك  جونەلتۋ پۋنكتىنە، سودان كەيىن تەرگەۋ يزولياتورىنا اينالدى دەپ حابارلادى  turkystan.kz Polisia.kz سايتىنا سىلتەمە جاساپ.

بۇل – قىلمىستىق-اتقارۋ جۇيەسىندەگى ەڭ كونە مەكەمە. مۇندا ەلىمىزدەگى ەڭ اۋىر جازا العان 231 سوتتالعان ازاماتشا جازاسىن وتەپ جاتىر. جازاسىن وتەپ جۇرگەن ايەلدەردىڭ تۇرمەدەگى كۇندەلىكتى ءومىرى جايلى شىمكەنت جانە تۇركىستان وبلىسى بويىنشا قاجد-عا قاراستى يچ-167/4 مەكەمەسىنىڭ سوتتالعاندار اراسىنداعى تاربيە جانە الەۋمەتتىك پسيحولوگيالىق جۇمىس ءبولىمىنىڭ باستىعى ەلميرا تويلىباەۆا ايتىپ بەردى. شىمكەنت قالاسى جانە تۇركىستان وبلىسى بويىنشا قاج دەپارتامەنتىنە قاراستى يچ-167/4 مەكەمەسى – قازاقستان اۋماعىنداعى جالعىز قاتاڭ رەجيمدەگى ايەلدەر كولونياسى، ازاماتشالار ءۇشىن بارىنشا قاۋىپسىز پەنيتەنتسيارلىق مەكەمە. اتالعان كولونيادا بۇگىندە 231 سوتتالعان ازاماتشا جازاسىن وتەپ جاتىر.

وكىنىشكە تولى ءومىر. ايەلدەر كولونياسى

ادىلەت كاپيتانى ەلميرا تويلىباەۆانىڭ سوزىنشە، ءبىر كامەرادا 6-8 ادام ۇستالىنادى، كەيبىرەۋلەرىندە 10-نان استام تۇتقىن بار. ولاردىڭ ەڭ جاسى 25 جاستا. ول 2017 جىلى قر قك-ءنىڭ 99-بابى (ادام ءولتىرۋ) بويىنشا كىنالى دەپ تانىلىپ، 9،5 جىلعا باس بوستاندىعىنان ايىرىلعان. قالعانى ورتا ەسەپپەن العاندا 30-35 جاس ارالىعىنداعى ايەلدەر. مۇندا جازاسىن وتەپ وتىرعان سوتتالعانداردىڭ باسىم كوپشىلىگى اۋىر جانە اسا اۋىر قىلمىسقا بارعاندار. ستاتيستيكاعا سۇيەنسەك، 231 سوتتالعاننىڭ 42-ءسى ادام ولتىرگەن، 52-ءسى الاياقتىق جاساعان، 90-ى ەسىرتكى ساتقان، 23-ءى ۇرلىق، 19-ى اۋىر دەنە جاراقاتتارىن جاساعان، قالعانى باسقا دا قىلمىستارى ءۇشىن قاماۋدا وتىر. ولاردىڭ جازاسى 12 جىلدان باستاپ ءومىر بويى باس بوستاندىعىنان ايىرۋعا دەيىن بارادى.

جازا باسىپ، ءومىرىنىڭ وسى كەزەڭىن تەمىر توردا وتكىزىپ جۇرگەن ايەلدەر مەكەمەدە بەلگىلى ءبىر تارتىپپەن كۇن وتكىزەدى. ول ءتارتىپ تاڭعى ساعات 06:00-دە باستالادى. سوتتالعاندار جاتتىعۋ جاساپ، تاڭعى اسقا جايعاسادى. تەكسەرىس جۇرگىزىلىپ بولعاننان كەيىن جازاسىن وتەۋشىلەر كۇن تارتىبىنە سايكەس جۇمىس ورىندارىنا جىبەرىلەدى. قاج قىزمەتكەرىنىڭ ايتۋىنشا، تەمىر توردىڭ ار جاعىنداعى ايەلدەردى جۇمىسقا ورنالاستىرۋ ماسەلەسى ارقاشان وزەكتى بولماق.

وكىنىشكە تولى ءومىر. ايەلدەر كولونياسى

«بۇل ەڭ كونە مەكەمەنىڭ اۋماعى شاعىن كەلگەن. بىراق مۇمكىندىگىنشە بارلىق بوس ءۇي-جايلاردى جۇمىس ورىندارىمەن قامتاماسىز ەتەمىز. بۇگىنگى كۇنى مەكەمە اۋماعىندا ءۇش جەكە كاسىپكەر جۇمىس ىستەيدى، وندا 108 سوتتالعان ەڭبەك ەتەدى»، – دەيدى ە.تويلىباەۆا.

نەگىزىنەن مۇندا ايەلدەر جۇمساق ينتەرەر زاتتارىن تىگەدى: جاستىقتار مەن كورپەلەر – ءبارى تاپسىرىستارعا بايلانىستى. مۇنداعى ءبىرشاما ايەل العاشقى ءبىلىمىن مەكەمە قابىرعاسىندا العان ەكەن. كەيبىر ايەلدەر اسپازشى بولىپ جۇمىس ىستەيدى. ءمازىردىڭ بارلىق تالاپتارىنا سايكەس باسقا سوتتالعاندارعا تۇسكى اس دايىندايدى. ەگەر جۇمىس اۋىسىمى تۇسكە دەيىن اياقتالسا، وندا سوتتالعاندار مەكەمەنى اباتتاندىرۋ جۇمىستارىمەن اينالىسا الادى.

وكىنىشكە تولى ءومىر. ايەلدەر كولونياسى

– ساعات 17:00-دە ادەتتەگىدەي تەكسەرۋ جۇرگىزىلەدى، 18:00-دە كەشكى استارىن ىشەدى. تاماقتان سوڭ ءبىرازى كامەرالارىنا بارسا، قالعانى كىتاپحاناعا بارادى. اباقتىداعى ءومىر بوستاندىقتاعىداي زىمىراپ وتپەيدى، ۋاقىت باياۋ جىلجيدى. سوندىقتان مۇنداعى ايەلدەر ۋاقىتتارىن پايدالى وتكىزۋ ءۇشىن كىتاپ وقۋعا جاقسى كوڭىل بولەدى. ءتىپتى كىتاپ الىپ وقۋ ءۇشىن ايەلدەر كەزەكتە تۇرادى. سوتتالعاندار ءۇشىن تاربيەلىك ءمانى بار ءىس-شارالار، ياعني كونتسەرتتەر، پسيحولوگيالىق ترەنينگتەر وتكىزىلەدى، ولار تەولوگتارمەن، يمامدار، باسقا دا ءدىن وكىلدەرىمەن كەزدەسەدى. ايەلدەر كەز-كەلگەن مادەني ءىس-شارالاردى ۇيىمداستىرۋعا مۇقيات قاراپ، دايىندىققا بار كۇشىن سالادى. ودان بولەك، ازاماتشالار بوس ۋاقىتىندا تاربيە جۇمىسى بولمەسىندە تەلەديدار كورىپ، جاڭالىقتار تىڭدايدى. تۇنگى وندا بارلىق سوتتالعاندار ۇيقىعا جاتقىزىلادى، – دەپ اتاپ ءوتتى سپيكەر.

 سوتتالعاندار ماۋسىمدىق كيىم، تاماق ونىمدەرىمەن، مەديتسينالىق كومەكپەن قامتاماسىز ەتىلەدى: ۋدز، مرت، وتا جاساۋ مەن تەكسەرۋلەر. – سوتتالعانداردىڭ جايلىلىعى ءۇشىن مەكەمە اۋماعىندا ازىق-ت ۇلىككە، گيگيەنا قۇرالدارىنا جانە باسقا دا تاۋارلارعا تاپسىرىس بەرۋگە ارنالعان ەلەكتروندىق ينتەرنەت-دۇكەن تەرمينالى جۇمىس ىستەيدى، بۇل وتە ىڭعايلى، سەبەبى بىزدە قازاقستاننىڭ بارلىق ايماقتارىنان كەلگەن سوتتالعاندار جازاسىن وتەيدى جانە بارلىق ايەلدەرگە تۋىستارىنىڭ كەلۋگە مۇمكىندىكتەرى بولا بەرمەيدى، – دەپ ءتۇسىندىردى ادىلەت كاپيتانى. سپيكەردىڭ پايىمداۋىنشا، بۇل قاتاڭ رەجيمدەگى كولونيادا جۇكتى ايەلدەر جازاسىن وتەمەيدى. سوتتالعان ازاماتشا مەكەمەدە جۇكتى بولىپ قالعان جاعدايدا (كۇيەۋىمەن كەزدەسۋدەن كەيىن) نەمەسە جۇكتى بولىپ كەلسە، وندا ونى الماتى قالاسىنىڭ قاج دەپارتامەنتىنە قاراستى مەكەمەگە اۋىستىرادى، ونداي ايەلدەر ءوز بالالارىمەن 3 جاسقا دەيىن تەمىر توردىڭ ار جاعىندا بىرگە بولا الادى.

كولونياداعى ىشكى ءتارتىپ ەرەجەلەرىنە سايكەس، مەكەمە اۋماعىندا سوتتالعاندارعا ەكى تاۋلىكتىك ۇزاق مەرزىمدى جانە ەكى ساعات قىسقا مەرزىمدى كەزدەسۋلەر بەرىلەدى.

«سوتتالعاندارعا ۇزاق مەرزىمدى كەزدەسۋلەر جۇبايىمەن، جاقىن تۋىستارىمەن، سوتتالعان اداممەن نەكەدە تۇرمايتىن، ونىمەن ورتاق بالالارى بار ادامدارعا بىرگە تۇرۋ قۇقىعىمەن جانە سالەمدەمە الۋ قۇقىعىمەن بەرiلەدi. تەلەفونمەن سويلەسۋگە رۇقسات سوتتالعانداردىڭ جازباشا ءوتiنiشi بويىنشا 15 مينۋتقا بەرiلەدi»، – دەپ اتاپ ءوتتى ەلميرا.

«ء;تارتىپ بارىنە بىردەي» دەيدى سپيكەر. سول سەبەپتى ىشكى تارتىپكە باعىنباعان ايەلدەرگە شارا قولدانىلاتىنىن دا اتاپ ءوتتى. – جازاسىن وتەۋشىلەر مەكەمە ءتارتىبىن بۇزعان جاعدايدا قولدانىستاعى زاڭناماعا ساي تارتىپتىك جازالاۋ شارالارى قولدانىلادى. ول قر قاك-ءنىڭ 131-بابى بويىنشا قولدانىسقا ەنگىزىلەدى. سوتتالعان ايەلدەرگە ەسكەرتۋ، سوگىس، ون بەس تاۋلىككە دەيىنگى مەرزىمگە تارتىپتىك يزولياتورعا قاماۋ، ءتورت ايعا دەيىنگى مەرزىمگە جالعىز ادامدىق كامەرالارعا اۋىستىرۋ دەگەن جازالار بەرىلۋى مۇمكىن، – دەپ ءبولىستى قاج قىزمەتكەرى. مەكەمە قىزمەتكەرىنىڭ بەرگەن اقپاراتتارىنا سۇيەنسەك، اباقتىدان قاشۋ جانە ءوز-وزىنە قول جۇمساۋ، توبەلەس شىعارۋ، كۇش-كورسەتۋ، قورقىتۋ سىندى ارەكەتتەر ورىن الماعان. سەبەبى مۇندا سوتتالعانداردىڭ ءتارتىپتى بۇزباۋى ءۇشىن ۇزدىكسىز جۇمىستار جۇرگىزىلەدى. ولاردىڭ اراسىندا مورالدىق-پسيحولوگيالىق احۋالدى قالىپتاستىرۋ ماقساتىندا ءىس-شارالار، اڭگىمەلەسۋ ءجيى وتكىزىلەدى.

وكىنىشكە تولى ءومىر. ايەلدەر كولونياسى

«بۇگىندە ايەلدەر كولونياسىندا سوتتالعاندار اراسىندا جانجال، اباقتىدان قاشۋ، سۋيتسيد جاساۋ جاعدايلارى ورىن الماعان. سەبەبى مۇندا تاعدىرلاس جاندار جازاسىن وتەۋدە. ءبىر-بىرىنە قولداۋ كورسەتۋگە تىرىسادى. ولاردىڭ ارماندارى دا ورتاق. ولار بوستاندىقتا، ەركىندىكتە وتباسىلارىمەن قاۋىشۋدى ارماندايدى. ءۇمىت ۇزبەيدى، كۇتەدى. ءبىر-ءبىرىنىڭ جاعدايلارىن، ىشكى سەزىمدەرىن ايتپاسا دا، كوزبەن ۇعىنىسا الاتىن ءبىر تولقىندا كەلە جاتقان شالىس باسقان ايەلدەر»، – دەپ تۇيىندەدى ءوز ءسوزىن ەلميرا تويلىباەۆا.

تەمىر توردىڭ ار جاعىندا دا ءومىر بار. بىراق ول جاقتا ءبارى باسقاشا. ءار كامەرا سارعايعان ساعىنىش پەن وكىنىشكە تولى.

 

Back to top button