الماتى اكىمى سىبايلاس جەمقورلىققا قارسى كۇرەس بويىنشا كەڭەس وتكىزدى

الماتى قالاسىنىڭ اكىمى ەربولات دوساەۆتىڭ توراعالىعىمەن سىبايلاس جەمقورلىققا قارسى ءىس-قيمىل ماسەلەلەرى جونىندەگى قالالىق كوميسسيانىڭ كەڭەيتىلگەن وتىرىسى ءوتتى. وتىرىسقا اۋدان اكىمدەرى، مەملەكەتتىك جانە قۇقىق قورعاۋ ورگاندارىنىڭ، كۆازيمەملەكەتتىك سەكتوردىڭ باسشىلارى مەن قوعام وكىلدەرى قاتىستى.

ەربولات دوساەۆ ءوزىنىڭ سوزىندە سىبايلاس جەمقورلىقتى جويۋ ءۇشىن پاراقورلىق جاعدايلاردى بارىنشا ازايتۋعا مۇمكىندىك بەرەتىن جۇيەلى شارالار قابىلداۋ قاجەتتىگىن اتاپ ءوتتى.

الماتى اكىمى سىبايلاس جەمقورلىققا قارسى كۇرەس بويىنشا كەڭەس وتكىزدى

«ءاربىر باسشى سىبايلاس جەمقورلىقتىڭ الدىن الۋعا باعىتتالعان ناقتى شارالاردى قابىلداۋى  تيىس. مەملەكەتتىك ورگانداردىڭ ءاربىر باسشىسىن KPI-دە سىبايلاس جەمقورلىققا قارسى قابىلدانىپ جاتقان شارالارى، ال ونىڭ ىشىندە قاراماعىنداعى قىزمەتكەرلەردىڭ سىبايلاس جەمقورلىق فاكتىلەرى بويىنشا باعالاۋدى قاراستىرۋ قاجەت»، – دەدى قالا اكىمى ەربولات دوساەۆ.

قازاقستان سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنىڭ باسشىسى اسحات ورازحاننىڭ ايتۋىنشا، بۇگىندە سىبايلاس جەمقورلىقتىڭ الدىن الۋ ماسەلەسىندە وڭ ىلگەرىلەۋ بار.

«مەملەكەتتىك قىزمەتشىلەردىڭ وزدەرىنە ۇسىنعان پارا تۋرالى حابارلايتىن ترەند بايقالادى، كەيبىر جاعدايلاردا ولاردىڭ سوماسى 70 ملن تەڭگەدەن اسادى. جاستار اراسىندا دا دۇنيەتانىم وزگەرۋدە، الەۋمەتتىك جەلىلەردە وقۋشىلار عيماراتتى زاڭسىز جالعا بەرۋدى جوسپارلاعان مەكتەپ ديرەكتورىنىڭ ءىس-ارەكەتىنە جۇگىندى»، – دەدى اسحات ورازحان.

وسى جىلدىڭ التى ايىندا الماتىدا سىبايلاس جەمقورلىق فاكتىلەرى تۋرالى حابارلاعانى ءۇشىن 640 مىڭ تەڭگەدەن استام سوماعا 3 ادام ىنتالاندىرىلدى.

الماتى اكىمى سىبايلاس جەمقورلىققا قارسى كۇرەس بويىنشا كەڭەس وتكىزدى

كەزدەسۋ بارىسىندا سىبايلاس جەمقورلىق تاۋەكەلدەرىنە ىشكى تالداۋ جۇرگىزۋ، كومپلاەنس-قىزمەتتى ەنگىزۋ جانە سىبايلاس جەمقورلىققا قارسى مادەنيەتتى قالىپتاستىرۋ تەتىكتەرى مەن قورىتىندىلارى قارالدى.

وتىرىس قورىتىندىسى بويىنشا قالا اكىمى ەربولات دوساەۆ مەملەكەتتىك ورگانداردىڭ باسشىلارىنا سىبايلاس جەمقورلىق تاۋەكەلدەرىن انىقتاۋ، جويۋ جانە سىبايلاس جەمقورلىققا قارسى مادەنيەتتى نىعايتۋ بويىنشا تۇراقتى جۇمىس جۇرگىزۋدى تاپسىردى.

ۇقساس جاڭالىقتار

Back to top button