تەننيستەن ءاچ: قازاقستان جاسوسپىرىمدەرى سلوۆەنيا قۇراماسىن جەڭدى

قازاقستان جاسوسپىرىمدەر قۇراماسى چەحيانىڭ پروستەەۆ قالاسىندا 14 جاسقا دەيىنگىلەر اراسىندا ءوتىپ جاتقان كوماندالىق الەم چەمپيوناتىنىڭ جارتىلاي فينالىنا شىقتى دەپ حابارلادى turkystan.kz.

قازاقستاندىق جاسوسپىرىمدەر شيرەك فينالدا سلوۆەنيا قۇراماسىمەن كۇش سىناستى. قازاقستان تەننيس فەدەراتسياسى مالىمەتىنشە، ءبىرىنشى كەزدەسۋدە دانيەل تازابەكوۆ تاعى دا ءۇمىتتى اقتادى. باستاپقى پارتيادا سۆيت سۋليچكە 4:6 ەسەبىمەن ەسە جىبەرگەنىنە قاراماستان، جەڭىسكە دەگەن جىگەرىن تانىتا ءبىلدى. ەكىنشى سەتتە تاي-برەيكتە قارسىلاسىن تىعىرىققا تىرەدى – 7:6 (8:6). ءۇشىنشى، شەشۋشى پارتيادا دانيەل 4:1 ەسەبىمەن العا شىقتى. التىنشى گەيمدە سۋليچ مەديتسينالىق كومەككە جۇگىندى. جاس قازاقستاندىق تەننيسشى تىزگىندى ۋىسىنان شىعارعان جوق – 6:2.

سودان كەيىن قوس قۇرامانىڭ كوشباسشىلارى زاڭعار نۇرلان ۇلى مەن جيگا شەشكو كورتقا شىقتى. ءبىرىنشى سەت زاڭعاردىڭ پايداسىنا شەشىلدى – 6:4. ەكىنشى پارتيادا دا ول شەبەرلىگىنىڭ باسىم ەكەنىن كورسەتتى – 6:3.

وسىلايشا، قازاقستان جاسوسپىرىمدەر قۇراماسى (كاپيتانى سەرگەي كۆاك) ءوز تاريحىندا العاش رەت الەم چەمپيوناتىنىڭ جارتىلاي فينالىنا ءوتتى. جاس سپورتشىلارىمىز 5 تامىزدا فينالعا شىعۋ ءۇشىن گەرمانيا قۇراما كومانداسىمەن كەزدەسەدى.

 

ۇقساس جاڭالىقتار

Back to top button