قازاقستاندا رەسەيلىك ەكى جوعارى وقۋ ورنىنىڭ فيليالى اشىلادى

2022 جىلدىڭ كۇزىندە قازاقستاندا رەسەيدىڭ ەكى جوعارى وقۋ ورنىنىڭ فيليالى اشىلادى. ۇكىمەت ءتيىستى قاۋلى قابىلدادى دەپ حابارلادى  turkystan.kz رrimeminister.kz سايتىنا سىلتەمە جاساپ.

رەسەيدىڭ «ميفي» ۇلتتىق يادرولىق زەرتتەۋ ۋنيۆەرسيتەتىنىڭ فيليالى الماتى قالاسىندا، ي.م. گۋبكين اتىنداعى رەسەي مەملەكەتتىك مۇناي جانە گاز ۋنيۆەرسيتەتىنىڭ فيليالى اتىراۋ قالاسىندا اشىلادى. بيىل قازان ايىندا اتالعان جوعارى وقۋ ورىندارى فيليالدارىنىڭ بازاسىندا «قورعالعان جوعارى ءونىمدى ەسەپتەۋ جۇيەلەرى»، «ەلەمەنتار بولشەكتەر فيزيكاسى جانە عارىش فيزيكاسى»، «مۇناي مەن گازدى ىزدەۋ جانە بارلاۋ»، «مۇناي جانە گاز كەن ورىندارىن يگەرۋ، پايدالانۋ جانە كەشەندى مەحانيكالاندىرۋ مەن اۆتوماتتاندىرۋ»، «مۇناي جانە گاز تاسىمالداۋ» سياقتى ماماندىقتار بويىنشا كادرلاردى دايىنداۋ باستالادى. وعان 200 گرانت ءبولىندى. وقۋ پروتسەسىنە جەتەكشى رەسەيلىك پروفەسسورلار تارتىلماق.

«كاسىبي كادرلاردى دايارلاۋ مەن عىلىمي زەرتتەۋلەردى ۇيىمداستىرۋدا جوعارى وقۋ ورىندارىن الەم ەلدەرىنىڭ تاجىريبەسىمەن ۇشتاستىرۋ جانە ىنتىماقتاستىق اۋقىمىن كەڭەيتۋ زاماناۋي ءبىلىم بەرۋ تەحنولوگيالارىن كەڭىنەن ەنگىزۋگە مۇمكىندىك بەرەدى. تەحنيكالىق كادرلاردى دايىنداۋ جاعىنان رەسەيلىك عىلىم الەمدەگى ەڭ ۇزدىكتەردىڭ ءبىرى سانالادى. سوندىقتان بۇل تاجىريبە بىزگە وتە پايدالى»، – دەدى قر عىلىم جانە جوعارى ءبىلىم ءمينيسترى ساياسات نۇربەك. 

ەلىمىزدە رەسەيلىك ۋنيۆەرسيتەتتەر فيليالدارىنىڭ اشىلۋى قازاقستاندىق جاستارعا ەلدەن شىقپاي-اق جەتەكشى شەتەلدىك جوعارى وقۋ ورىندارىنىڭ ديپلومىن الۋعا مۇمكىندىك بەرەدى.

مەملەكەت باسشىسى ەلىمىزدە 2025 جىلعا دەيىن شەتەلدىك جوعارى وقۋ ورىندارىنىڭ 5 جاڭا فيليالىن اشۋ تۋرالى تاپسىرما بەرگەن بولاتىن. 2022 جىلدىڭ اقپان ايىندا قر ءبىلىم جانە عىلىم مينيسترلىگى مەن رف عىلىم جانە جوعارى ءبىلىم مينيسترلىگى اراسىندا ءوزارا ىنتىماقتاستىق تۋرالى مەموراندۋمعا، سونداي-اق قر ۇكىمەتى مەن رف ۇكىمەتى اراسىندا ەكى ەلدىڭ جوعارى وقۋ ورىندارىنىڭ فيليالدارىن اشۋ تۋرالى كەلىسىمگە قول قويىلعان.

 

ۇقساس جاڭالىقتار

Back to top button