مەكتەپ فورماسى 25-30%-عا قىمباتتادى

مەكتەپ فورماسىنىڭ قۇنى 25-30% قىمباتتاعان دەپ حابارلادى turkystan.kz «استانا» ارناسىنا سىلتەمە جاساپ.

ەلوردا تۇرعىنى سامەن اسحات – 3 بالانىڭ اكەسى. جىلدا 2 بالانى مەكتەپكە دايىنداپ جۇرسە، بيىل وعان كەنجەسى قوسىلدى.

«ءار بالاعا كەم دەگەندە 100 مىڭداي تەڭگە دايىنداۋ كەرەك. كيىمدەر وتە قىمبات. 1-سىنىپقا باراتىن ۇلىمنىڭ فورماسىنىڭ ءوزى 40 مىڭ تەڭگەدەن اسادى. اياق كيىمدى 20 مىڭ تەڭگەگە الدىق. امال جوق»، – دەدى نۇر-سۇلتان قالاسىنىڭ تۇرعىنى سامەن اسحات.

قىمباتشىلىقتى ساتۋشىلار دا مويىندايدى. تاۋاردى  قىرعىز، قىتاي تۋركيادان الدىرادى. وتاندىق وندىرىستەگى مەكتەپ فورمالارىنىڭ كوتەرمە باعاسىنىڭ ءوزى قالتاعا اۋىر تيەتىندىگىن ايتادى.

مەكتەپ فورماسى بىلتىرعىمەن سالىستىرعاندا 25-30 پايىز قىمباتتاعان. قازىر بازاردا يۋبكانىڭ قۇنى 3،5 مىڭ مەن 8 مىڭ تەڭگە  ارالىعىندا. اق كويلەك 3600 تەڭگەدەن  12 مىڭ تەڭگەگە دەيىن بارادى.  شالباردىڭ ارزانى 4 مىڭعا باعالانسا، ساپاسى جاقسىسى 12 مىڭنان اسىپ جىعىلادى. قىزداردىڭ سارافان كويلەكتەرىنىڭ ساپالىسى 22 مىڭ تەڭگە،  ەر بالالاردىڭ ۇشەۋلىك كوستيۋم-شالبارى 25 مىڭ تەڭگە تۇرادى.

«تۋركيا مەن پەكيننىڭ تاۋارلارى قىمبات. بىشكەك قولجەتىمدى. بىراق سونىڭ وزىندە بىلتىرعى باعامەن سالىستىرعاندا 25-30 پايىزعا وسكەن»، – دەدى كاسىپكەر ساعادات كومەكباەۆا.

وقۋ-اعارتۋ مينيسترىلىگى اتا-انانىڭ قالتاسىنا اۋىرتپالىق تۇسىرمەيمىز دەپ بارلىق مەكتەپكە بىرىڭعاي قويۋ كوك ءتۇستى مەكتەپ فورماسىن ەنگىزبەكشى.

«الدىمىزداعى وقۋ جىلىندا مەكتەپ فورماسىنا قويىلاتىن تالاپتارعا وزگەرىس ەنگىزىلمەيدى. مەكتەپ فورماسىنا قويىلاتىن تالاپتار مينيسترلىكتىڭ 26-بۇيرىعىنا سايكەس ساقتالۋدا»، – دەدى وقۋ-اعارتۋ مينيسترلىگىنىڭ مەكتەپكە دەيىنگى جانە ورتا ءبىلىم بەرۋ كوميتەتى توراعاسىنىڭ ورىنباسارى جومارت قارامباەۆ.

اتا-انالارعا مەكتەپ فورماسىن وتاندىق وندىرۋشىلەردەن ساتىپ الۋ ۇسىنىلۋدا. ساتىپ الاتىن ءوندىرۋشى مەن ساۋدا ورتالىعىن اتا-انالار وزدەرى تاڭدايدى.  بۇل ازىرگە ءتيىستى مەملەكەتتىك ورگاندارمەن، اتا-انالار قاۋىمداستىعىمەن تالقىلانۋدا.

ۇقساس جاڭالىقتار

Back to top button