ءوز قىزىن ءولتىرىپ العان ايەل سوت ۇكىمىنە نارازى

اقتاۋدا 3 جاسار قىزىن ۇرىپ ولتىرگەن ايەل سوت ۇكىمىنە شاعىم ءتۇسىردى. وعان 8 جىل باس بوستاندىعىنان ايىرۋ جازاسى تاعايىندالعان ەدى دەپ حابارلادى turkystan.kz.

ماڭعىستاۋ وبلىستىق سوتىنىڭ قىلمىستىق ىستەر جونىندەگى سوت القاسى بالانىڭ دەنساۋلىعىنا قاساقانا اۋىر زيان كەلتىرىپ، ابايسىزدا ولىمگە اكەلىپ سوققان قىلمىستىق ءىستى اپەللياتسيالىق تارتىپپەن قارادى.

«ءبىرىنشى ساتىداعى سوت ۇكىمى بويىنشا ايەلگە 8 جىلعا باس بوستاندىعىنان ايىرۋ جازاسى تاعايىندالدى. ۇكىمگە جابىرلەنۋشىنىڭ زاڭدى وكىلى، سوتتالعان ادام جانە ونىڭ ادۆوكاتى اپەللياتسيالىق شاعىم جاسادى. سوتتالۋشىنىڭ قورعاۋشىسى ءىستى قىلمىستىق كودەكستىڭ 106-بابى (ابايسىزدا ادام ولىمىنە الىپ كەلۋ) بويىنشا قايتا قاراۋدى سۇرادى. اپەللياتسيالىق القا ءبىرىنشى ساتىداعى سوت ۇكىمىنىڭ زاڭدى جانە نەگىزدى شىعارىلعانىن، ۇكىمدى وزگەرتۋگە، ونىڭ كۇشىن جويۋعا جانە اپەللياتسيالىق شاعىمداردىڭ دالەلدەرىن قاناعاتتاندىرۋعا نەگىز جوقتىعىن انىقتادى. سوندىقتان سوت ۇكىمى وزگەرىسسىز، اپەللياتسيالىق شاعىمدار قاناعاتتاندىرۋسىز قالدىرىلدى»، – دەدى ماڭعىستاۋ وبلىستىق سوتىنىڭ ءباسپاسوز قىزمەتىندەگىلەر.

ەسكە سالساق، وقيعا بيىلعى 4 قاڭتاردا بولعان. ايەل قىزىن ۇرىپ، يتەرىپ جىبەرگەن. ىشىمەن ۇستەلدىڭ بۇرىشىنا سوعىلعان بالادا گەماتوما پايدا بولادى. بىرنەشە كۇننەن كەيىن ايەل تاعى دا اشۋلى كۇيدە قىزىنىڭ ىشىنەن ۇرادى. سودان كەيىن قىزىن ۇيگە تاستاپ، كەتىپ قالادى. بىرنەشە ساعاتتان كەيىن قىز دەنە جاراقاتىنان قايتىس بولعان.

ۇقساس جاڭالىقتار

Back to top button