دەندروساياباققا قۇنى ءبىر بولمەلى پاتەرمەن پارا-پار دارەتحانالار ساتىپ الىنعان

شىمكەنتتەگى دەندروساياباققا قۇنى ءبىر بولمەلى پاتەرمەن پارا-پار كوشە دارەتحانالارى ساتىپ الىنعان دەپ حابارلادى turkystan.kz otyrar.kz-كە سىلتەمە جاساپ.

«Shymkent» الەۋمەتتىك-كاسىپكەرلىك كورپوراتسياسى دەندرولوگيالىق باق ءۇشىن جالپى سانى 5 اجەتحانا بولگەن. جۇمسالعان قارجى كولەمى – 45 ملن تەڭگە. شىمكەنت قالالىق سىبايلاس جەمقورلىققا قارسى ءىس-قيمىل اگەنتتىگى بولىنگەن قارجى ءتيىمدى جۇمسالماعانىن ايتادى. ال ارقايسىسى 9 ملن تەڭگە تۇراتىن اجەتحانانىڭ جاعدايى دا ءماز ەمەس كورىنەدى.

شىمكەنتتەگى دەندرولوگيالىق ساياباققا ءدال وسىنداي 5 دارەتحانا ساتىپ الىنعان. سايكەسىنشە، 45 ملن تەڭگە قارجى جۇمسالعان. الايدا، قۇنى ءبىر بولمەلى پاتەرمەن شامالاس اجەتحانالاردىڭ جاعدايى ءماز ەمەس. قاقپاعى سىنعان، جىلى سۋ جوق، قول كەپتىرۋگە ارنالعان قۇرال دا ىستەن شىققان جانە ەڭ باستىسى، مۇمكىندىگى شەكتەۋلى جاندارعا ارنالعان بولمەلەردىڭ ەسىگى جابىق.

ساياباقتا جۇمىس ىستەيتىن تازالىقشىلار دارەتحانانىڭ بۇعان دەيىنگى ۇلگىسى قولايلى ەدى دەيدى.

«ءبىزدىڭ حالىق مۇنداي اجەتحانالارعا ءالى دايىن ەمەس. ۇنەمى شاشىلىپ جاتادى. بۇگىن ىستەپ قويسا، ەرتەڭ سىندىرىپ كەتەدى. ۇستىنە ءمىنىپ وتىرادى. كوپشىلىك ءالى ەسكى تۋالەتتى پايدالانادى. سەبەبى، مىنانىڭ ىشىندە وتىرۋ مۇمكىن ەمەس، ءيىسى دە شىعىپ كەتەدى»، – دەيدى ا.اسقاروۆ اتىنداعى دەندرولوگيالىق ساياباق قىزمەتكەرى گۇلجان مەيىربەكوۆا.

دارەتحانا سالۋعا قاجەتتى قارجى «شىمكەنت – قايىرىمدى قالا» قورىنان بولىنگەن. ال بۇل قور 2020 جىلى الەۋمەتتىك-كاسىپكەرلىك كورپوراتسياسى جانىنان قۇرىلعان. 2 جىل ىشىندە مۇندا دەمەۋشىلىك كومەك رەتىندە 1 ملرد-قا جۋىق قارجى تۇسكەن. ال ونىڭ 45 ميلليونى 5 دارەتحاناعا جۇمسالىپ وتىر. سىبايلاس جەمقورلىققا قارسى ءىس-قيمىل اگەنتتىگى تاراپىنان 1 اي كولەمىندە سىرتقى تالداۋ جۇمىستارى جۇرگىزىلگەن. ناتيجەسىندە، بىرقاتار كەمشىلىك انىقتالىپتى.

«تالداۋ ناۋرىز ايىندا جۇرگىزىلدى. تالداۋدىڭ ناتيجەسىندە بىرنەشە فاكتىلەر، كەمشىلىكتەر انىقتالدى. وسى بويىنشا ءبىزدىڭ تاراپتان ءتيىستى ۇسىنىستار ەنگىزىلدى. 2020 جىلى دەندرولوگيالىق ساياباق 7 مودۋلدىك اجەتحانا سالۋعا مەملەكەتتىك ساتىپ الۋ پورتالىنا ۇسىنىس بەرەدى. ول جەردە 35 ملن-عا ارقايسىسى 5،3 ملن تەڭگەدەن تۇسەدى. بىراق، اقپاراتتىق جۇيە بار، سوندا مەديانالىق باعا دەگەن بولادى، سول جەردە 1 اجەتحانانىڭ باعاسى 4 ملن 450 مىڭ تەڭگە جۋىق بولعان. بىراق ءبىز باعا كوتەرىلگەن دەگەن ۇسىنىس تاستادىق. سودان كەيىن ساياباق اجەتحانانى ساتىپ الۋدان مۇلدەم باس تارتادى»، – دەدى  سىبايلاس جەمقورلىققا قارسى ءىس-قيمىل اگەنتتىگى شىمكەنت قالاسى بويىنشا دەپارتامەنتىنىڭ باس مامانى جاني قامبار.

دەگەنمەن، 2021 جىلى دەندرولوگيالىق ساياباق اكىمشىلىگى الەۋمەتتىك-كاسىپكەرلىك كورپوراتسياسىنا مودۋلدىك اجەتحانا قاجەت دەگەن ۇسىنىسپەن شىعادى. 4 كۇننىڭ ىشىندە «شىمكەنت – قايىرىمدى قالا» قورىنا دەمەۋشىلىك كومەك رەتىندە 45 ملن تەڭگە قارجى اۋدارىلادى.

«ارينە، بۇل بيۋدجەتتىك قارجى ەمەس، دەگەنمەن، بۇل – دەمەۋشى، مەتسەناتتاردىڭ قارجىسى بولعاندىقتان قارجىنى ماقساتتى، ءتيىمدى جۇمساۋ قاجەت. بۇل جەردە ورتاشا باعانى كورسەتەتىن اقپاراتتىق جۇيە دە بار، سونىمەن قاتار كورپوراتيۆتىك قوردان تۇسكەن قارجىنى دا ءتيىمدى پايدالانۋ كەرەك ەدى. سوندا 9 ميلليوننان تۇسپەيتىن ەدى»، – دەدى جاني قامبار.

ايتا كەتسەك، «شىمكەنت – قايىرىمدى قالا» قورى ازاماتتاردىڭ الەۋمەتتىك وسال توپتارىنا كومەك كورسەتۋ، بيزنەستىك باستامالاردى قولداۋ جانە بيزنەس-جوبالاردى قارجىلاندىرۋ ءۇشىن قۇرىلعان. الايدا، قور قارجىسى باسقا باعىتتا، ياعني دارەتحانا ساتىپ الۋ ءۇشىن دە جۇمسالىپ وتىر. ال ءتيىستى باعادان 2 ەسە قىمباتقا ساتىپ الىنعان اجەتحانانىڭ تالاپقا ساي نەمەسە ساي ەمەستىگىن الدا ءتيىستى ۋاكىلەتتى ورگان تەكسەرەدى.

ۇقساس جاڭالىقتار

Back to top button