«قازاق جاستارىنىڭ كورەي مادەنيەتىنە قىزىعۋشىلىعى ارتۋدا» – داۋرەن اباەۆ

مادەنيەت جانە سپورت ءمينيسترى داۋرەن اباەۆ كورەي رەسپۋبليكاسىنىڭ ۇلتتىق جينالىسى دەپۋتاتتارىمەن كەزدەستى دەپ حابارلادى turkystan.kz ۆەدومستۆونىڭ ءباسپاسوز قىزمەتىنە سىلتەمە جاساپ.

بيىلعى جىلى قازاقستان رەسپۋبليكاسى مەن كورەيا رەسپۋبليكاسى اراسىنداعى ديپلوماتيالىق قاتىناستاردىڭ ورناعانىنا 30 جىل تولىپ وتىر. جيىندا ايتۋلى داتانى اتاپ وتۋگە بايلانىستى ماسەلەلەر تالقىلاندى.

«قازاقستاندىقتاردىڭ، اسىرەسە جاستاردىڭ كورەي مادەنيەتىنە دەگەن قىزىعۋشىلىعى ارتىپ كەلەدى. بۇعان دالەل – مادەني الماسۋ جىلى اياسىندا بىرقاتار ءىس-شارانىڭ وتكىزىلۋى. مىسالى، ك-pop كونتسەرتىن ايتۋعا بولادى. وسى اۋقىمدى ءىس-شاراعا ءوزىم دە قاتىسىپ، ارتيستەردىڭ ونەرىنە ءتانتى بولعانىمدى اتاپ وتكىم كەلەدى. قازىرگى تاڭدا ۇلتتىق مۋزەيدە كورەي سۋرەتشىسى پاك دە سوننىڭ كورمەسى ءوتىپ جاتىر»، – دەدى داۋرەن اباەۆ.

ءمينيستردىڭ ايتۋىنشا، بيىل – قازاقستاندا رەسپۋبليكالىق مەملەكەتتىك اكادەميالىق كورەي مۋزىكالىق كومەديا تەاترىنا 90 جىل. تەاتر – الەمدەگى ەڭ كونە ۇلتتىق كورەي تەاترلارىنىڭ ءبىرى. مادەني الماسۋ جىلى اياسىندا ونەر ۇجىمى كورەيادا گاسترولمەن بولىپ، «كومونارە» حالىقارالىق تەاتر فەستيۆالىنە قاتىستى.

سونداي-اق، 2022 جىلدىڭ 15 قازانىندا «قازاقستاننىڭ تۋريستىك مۇمكىندىكتەرى» تاقىرىبىندا روۋد-شوۋ وتكىزۋ جوسپارلانعان. ال قىركۇيەك ايىندا قازاقستاندا  كورەي كلاسسيكالىق مۋزىكاسىنىڭ كەشى وتەدى.

ەكىجاقتى اڭگىمە بارىسىندا تاراپتار ۇلتتىق مۇراعات قورلارىن قاۋىپسىز ساقتاۋدى قامتاماسىز ەتۋ جانە سپورتشىلاردى دايارلاۋ ماسەلەلەرىن قوزعادى.

ءوز كەزەگىندە «كورەيا – قازاقستان» پارلامەنتارالىق دوستىق توبىنىڭ توراعاسى ۋ ۆون شيك ەكى ەل اراسىنداعى مادەني-گۋمانيتارلىق بايلانىستاردىڭ دەڭگەيىنە جوعارى باعا بەردى.

ايتا كەتەيىك، كەزدەسۋ قازاقستان رەسپۋبليكاسىنىڭ ۇلتتىق مۋزەيىندە ءوتتى.  وندا شەتەلدىك دەلەگاتسيا وكىلدەرى ۇسىنىلعان ەكسپوزيتسيامەن تانىستى.

ۇقساس جاڭالىقتار

Back to top button