43 گرادۋس ىستىق: التى وبلىستا داۋىلدى ەسكەرتۋ جاريالاندى

16 جانە 17 شىلدەدە اۋا رايىنىڭ كۇرت ناشارلاۋىنا بايلانىستى قازاقستاننىڭ التى وبلىسىندا داۋىلدى ەسكەرتۋ جاريالاندى دەپ حابارلادى turkystan.kz.

قازگيدرومەتتىڭ مالىمەتىنشە التى وبلىستا بۇرشاق جاۋىپ، قاتتى جەل تۇرادى ءارى اپتاپ ىستىققا بايلانىستى توتەنشە ءورت قاۋپى كۇتىلەدى. 16 شىلدەدە سولتۇستىك قازاقستان وبلىسىنىڭ باسىم بولىگىندە جاڭبىر جاۋادى، ءوڭىردىڭ سولتۇستىگىندە، باتىسىندا، وڭتۇستىگىندە نايزاعاي ويناپ، كۇندىز بۇرشاق ءتۇسۋى، داۋىل تۇرۋى ىقتيمال.

تۇندە جانە تاڭەرتەڭ وبلىستىڭ سولتۇستىك-شىعىسىندا تۇمان تۇسەدى دەپ كۇتىلەدى. كۇندىز اتالعان ءوڭىردىڭ سولتۇستىگىندە، باتىسىندا، وڭتۇستىگىندە شىعىستان، سولتۇستىك-شىعىستان 15-20 م/س جىلدامدىقپەن جەل سوعادى، كەي تۇستا ەكپىنى 23 م/س جەتەدى. 16 شىلدەدە پەتروپاۆلدا كۇن كۇركىرەيدى.

16 شىلدەدە كۇندىز باتىس قازاقستان وبلىسىنىڭ باسىم بولىگىندە +35…+ 38°C قاتتى ىستىق بولادى دەپ كۇتىلەدى. ءوڭىردىڭ وڭتۇستىك-شىعىسىندا، باتىسىندا توتەنشە ءورت قاۋپى ساقتالادى.

ورالدا 16 شىلدەدە كۇندىز +35°C قاتتى ىستىق بولادى دەپ كۇتىلەدى.

16 شىلدەدە كۇندىز قىزىلوردا وبلىسىندا 43 گرادۋس اپتاپ ىستىق بولادى دەپ كۇتىلەدى. وبلىستىڭ باسىم بولىگىندە توتەنشە ءورت قاۋپى ساقتالادى. قىزىلوردادا كۇندىز: +43°C

16-17 شىلدەدە تۇركىستان وبلىسىنىڭ سولتۇستىگىندە، باتىسىندا، تاۋلى اۋداندارىندا شىعىستان 15-20 م/س جىلدامدىقپەن جەل سوعادى. كۇندىز ءوڭىردىڭ باسىم بولىگىندە +41…+43°C شاماسىندا قاتتى ىستىق بولادى دەپ بولجانادى.

تۇركىستاندا 16-17 شىلدەدە شىعىستان جەل سوعادى، ەكپىنى 15-20 م/س جەتەدى، كۇندىز قاتتى ىستىق بولادى: +41…+40°C. سينوپتيكتەر شىمكەنتتە 16-17 شىلدەدە كۇندىز قاتتى ىستىق بولادى دەپ بولجايدى.

16 شىلدەدە كۇندىز اقتوبە وبلىسىنىڭ سولتۇستىك-شىعىسىندا سولتۇستىك-باتىستان جەل سوعادى، ەكپىنى 15 م/س قۇرايدى. سىناپ باعانى 37°C كورسەتەدى.

16 شىلدەدە كۇندىز اتىراۋ وبلىسىندا جانە اتىراۋدا +35…+ 37°C قاتتى ىستىق بولادى، وبلىستىڭ وڭتۇستىگىندە اپتاپ ىستىق كۇتىلەدى: +40°C. ءوڭىردىڭ باتىسىندا توتەنشە ءورت قاۋپى ساقتالادى.

ۇقساس جاڭالىقتار

Back to top button