Сенбі, 8 Қазан, 2022

ДСМ: Қазақстандағы барлық перзентханалар күрделі жөндеуден өтеді

Денсаулық сақтау министрі Ажар Ғиният ана мен бала өлімін азайту үшін заманауи талаптарға сай перинаталдық орталықтар салынып, елдегі бүкіл перзентханалар күрделі жөндеуден өтетінін айтты деп хабарлады turkystan.kz. 

«Бірінші жартыжылдықта пандемия басталғаннан бері алғаш рет жалпы өлім-жітімнің азаюын байқап отырмыз. Өткен 6 айда халық арасындағы өлім-жітім 10 пайыз төмендеді. Десек те, денсаулық сақтау жүйесі түгел, толық ауқыммен жұмыс істеп жатыр. Тек COVID инфекциясымен ғана күресіп жатқан жоқ, аурулардың алдын алу, жоғары маманданған медициналық көмек дамып келеді. Көлік медицинасы, қашықтан емдеу жолға қойылды. Елде әлеуметтік-экономикалық ахуал жақсарып келе жатқанын ескерсек, денсаулық көрсеткіштері де жақсарып келеді», – деді ведомство басшысы ОКҚ-нің брифингінде.

Министрдің айтуынша, кейінгі 10 жылда бала өлімінің көрсеткіші құбылып тұр. Сондай-ақ ол елдегі перзентханалар мен перинаталдық орталықтарды сынға алды.

 «2014-2015 жылдары күрт өсу тіркелді. Одан кейінгі 2 жылда қайта бәсеңдеп, 2019 жылы қайта өсім пайда болды. Бұл бірінші кезекте аналардың денсаулығына байланысты. Сәби өлімі дегеніміз – бір жасқа толмаған балалардың өлімі екенін ескерсек, негізінен, көбі перинаталдық себептерден көз жұмады. Балалар белгілі бір аурумен туады деген сөз. Бұл бағытта не істеліп жатыр? Біздегі перзентханалардың, перинаталдық орталықтардың көбі өткен ғасырда салынған. Олардың материалдық-техникалық базасы баяғыда ескіріп кеткен. Шала туған және аурумен туған нәрестелерді бұл нысандарда емдеп, ұстауға тиісті жағдай жасалмаған. Нысандар халықаралық стандарттарға сай келмейді. Президенттің қолдауымен, тапсырмасымен Үкімет жаңа перинаталдық орталықтардың құрылысын жоспарлайтын болды. Сондай-ақ, бүкіл перзентханаларда күрделі жөндеу жүргізіледі», – деді Ажар Ғиният.

Ұқсас жаңалықтар

Back to top button