قازاقستاندا 40 ملن گەكتار جەر پايدالانىلماي بوس جاتىر – ءاليحان سمايىلوۆ

بىلتىر پايدالانىلماي جاتقان 400 مىڭ گەكتار جەر قايتارىلدى، ال بيىل 5 ملن گەكتارعا دەيىن جەر الىنادى. بۇل تۋرالى قر پرەمەر-ءمينيسترى ءاليحان سمايىلوۆ ايتتى دەپ حابارلادى turkystan.kz قازاقپاراتقا سىلتەمە جاساپ.

«ءبىز عارىشتىق مونيتورينگ ءتاسىلى ارقىلى جەردىڭ پايدالانىلۋىن باقىلايمىز. بۇل نورما بىلتىر وتاندىق زاڭناماعا ەنگىزىلگەن. وسى عارىشتىق مونيتورينگ ناتيجەسىندە 40 ملن گەكتار جەر پايدالانىلماي جاتىر دەگەن اقپارات الدىق. ونىڭ 95 پايىزى – جايىلىم جەرلەرى. جايىلىم جەردىڭ تاپشىلىعى بار ەكەنى بارشامىزعا ءمالىم. بىراق ولاردى قايتارۋ ماسەلەسى ءبىر كۇندە شەشىلمەيدى. نەگە دەسەڭىز، كونستيتۋتسيامىزدا جەكەمەنشىك قۇقىقتار قورعالعان. سوندىقتان سول پايدالانبايتىن جەرلەردى قايتارۋ ماسەلەسى سوت تارتىبىمەن شەشىلەدى»، – دەدى ءاليحان سمايىلوۆ ۇلتتىق ارنادا «جاڭا قازاقستان» باعدارلاماسىندا.

ونىڭ ايتۋىنشا، بۇل ماسەلە جونىندە ارنايى كوميسسيا قۇرىلدى جانە بيىل بۇل جۇمىستار جاندانادى.

«بىلتىر پايدالانىلماي جاتقان جەرلەردىڭ 400 مىڭ گەكتارى قايتارىلدى. بيىل مۇنى 5 ملن گەكتارعا دەيىن جەتكىزەمىز. ياعني، بيىل قايتارىلاتىن جەر كولەمى 12 ەسەگە ۇلعايادى جانە ول جەرلەردى ناقتى پايدالاناتىن، اۋىلشارۋاشىلىق ءونىمىن شىعاراتىن وتاندىق كاسىپكەرلەرگە بەرۋ كەرەك. سوندىقتان بۇل وتە ماڭىزدى سۇراق»، – دەدى پرەمەر-مينيستر.

 

ۇقساس جاڭالىقتار

Back to top button