اماناتتىقتار الەۋمەتتىك كودەكس جوباسىنا بىرقاتار ۇسىنىس ەنگىزدى

الەۋمەتتىك كودەكستى ازىرلەۋ بارىسى «AMANAT» پارتياسى جانىنداعى وتباسى جانە حالىقتى الەۋمەتتىك قورعاۋ ماسەلەلەرى جونىندەگى رەسپۋبليكالىق قوعامدىق كەڭەستىڭ كەزەكتى وتىرىسىندا تالقىلاندى.

پرەزيدەنت قاسىم-جومارت توقاەۆ الەۋمەتتىك كودەكس ازىرلەۋدى تاپسىرىپ، بۇل زاڭ وسى ماڭىزدى سالانىڭ وزەكتى ماسەلەلەرىنە كەشەندى جاۋاپ بەرەتىنىن ايتقان بولاتىن.

كودەكس ازاماتتاردىڭ الەۋمەتتىك قۇقىقتارى مەن مىندەتتەرى تۋرالى بىرىڭعاي ءبىلىم كوزىن قۇرۋعا، مەملەكەتتىڭ، جۇمىس بەرۋشىلەر مەن قىزمەتكەرلەردىڭ الەۋمەتتىك سالاداعى مىندەتتەمەلەرى مەن جاۋاپكەرشىلىگىن بەكىتۋگە مۇمكىندىك بەرەدى دەپ كۇتىلۋدە.

«پارتيانىڭ سايلاۋالدى باعدارلاماسىندا بيىل الەۋمەتتىك كودەكس جوباسىن ازىرلەپ، پارلامەنتكە ەنگىزۋ مىندەتى تۇر. ونىڭ باستى ماقساتى – ەلىمىزدىڭ ءاربىر ازاماتى مەملەكەتتەن قانداي جاعدايدا قانداي كومەك الا الاتىنىن ناقتى رەتتەۋ. 6،7 ملن. قازاقستاندىق وتباسىنىڭ جارتىسىنا جۋىعى قولداۋعا مۇقتاج، 1،1 ملن. وتباسى داعدارىس جاعدايىندا ءومىر ءسۇرىپ جاتىر. 890 مىڭ وتباسىنىڭ تۇرمىسى تومەن دەپ تانىلدى. 625 مىڭ بالا از قامتىلعان وتباسىندا ءومىر ءسۇرىپ جاتىر. ەڭ الدىمەن ءدال وسى بالالار ءۇشىن ءتيىمدى مەملەكەتتىك قىزمەتتەر جاسالۋى ءتيىس»، – دەپ اتاپ ءوتتى كەڭەس توراعاسى، ءماجىلىس دەپۋتاتى دينارا زاكيەۆا.

دينارا زاكيەۆا

ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ ايتۋىنشا، كودەكستىڭ نەگىزگى قۇرىلىمى ازىرلەنگەن، ال قازىر قوعامدىق ۇيىمداردىڭ، مۇددەلى مەملەكەتتىك ورگانداردىڭ وكىلدەرى مەن ساراپشىلار قۇجاتتىڭ جەكەلەگەن ەرەجەلەرىن قىزۋ تالقىلاۋدان وتكىزىپ جاتىر.

اتاپ ايتقاندا، «وتباسىنىڭ تسيفرلىق كارتاسىن» قۇرۋ كوزدەلىپ وتىر. وندا بارلىق وتباسىن ەكونوميكالىق، تۇرعىن ءۇي جانە الەۋمەتتىك جاعدايلارى، سونداي-اق دەنساۋلىق جاعدايى مەن ءبىلىم دەڭگەيىنە قاراي: ءال-اۋقاتتى، قاناعاتتانارلىق، تۇرمىسى ناشار، داعدارىس جاعدايىندا جانە شۇعىل كومەكتى قاجەت ەتەتىن وتباسىلار دەگەن بەس ساناتقا بولىنەدى.

«وندا ءبىز ەلدەگى 19 ميلليوننان استام بارلىق ازامات تۋرالى اقپارات جيناعىمىز كەلەدى. ءارتۇرلى مەملەكەتتىك ورگانداردان دەرەكتەردى جيناقتايمىز. بۇل كارتادا قازاقستاندا قانداي وتباسىلار بار، وتباسى مۇشەلەرىنىڭ سانى قانشا، ولاردىڭ جاسى نەشەدە دەگەن سياقتى مالىمەتتەر بولادى. سونداي-اق، كارتادا وتباسىنىڭ ءار مۇشەسى جانە جالپى وتباسى الاتىن بارلىق الەۋمەتتىك كەپىلدىكتەر كورسەتىلگەن»، – دەدى مينيستر.

تامارا دۇيسەنوۆا

ءوز كەزەگىندە كەڭەس مۇشەسى، «باقىتتى شاڭىراق» قورىنىڭ باسشىسى بوتاگوز سۇلتانوۆا كودەكس جوباسىنا بىرقاتار تولىقتىرۋ ۇسىندى. اتاپ ايتقاندا، ول اۋتيستىك سپەكتردىڭ اۋرۋلارى بار بالالارعا مىندەتتى تۇردە ساناتوريالىق-كۋرورتتىق ەمدەۋدى ۇسىنۋ تۋرالى باستاما كوتەردى. ول سونداي-اق مەنتالدى بۇزىلىستارى بار بالالارعا ينۆاتاكسي قىزمەتتەرىن كورسەتۋدى، مەملەكەت قاراجاتى ەسەبىنەن مىنەز-ق ۇلىقتى قولدانبالى تالداۋ ماماندارىن وقىتۋدى جانە 18 جاسقا تولعاننان كەيىن اقىل-ەسى كەم 2-توپتاعى مۇگەدەكتىگى بار ادامعا كۇتىم جاساۋ بويىنشا جاردەماقى ەنگىزۋدى ۇسىندى.

«بۇگىندە مەنتالدى كەمىستىگى بار بالالار الەۋمەتتىك قولداۋدىڭ بارلىق تۇرىنەن تولىقتاي دەرلىك قاعىلىپ وتىر. ولار جولدى وزدىگىنەن كەسىپ وتە المايتىن، دارەتحاناعا دا وزدەرى شىعا المايتىن ەرەكشە بالالار بولسا دا قولداۋ كورسەتىلمەيدى. مۇندا ءار جاعدايدى جەكە قاراۋ كەرەك. سونىمەن قاتار، قازىر ولارعا جانە تىرەك-قيمىل اپپاراتى بۇزىلعان بالالارعا ساناتوريالىق-كۋرورتتىق ەمدەۋ بەرىلمەيدى. بۇعان قاتىستى دەنساۋلىق ساقتاۋ مينيسترلىگىنىڭ بۇيرىعى بار دەسەدى، بىراق بىزگە ول تۋرالى انىعى ايتىلمايدى»، – دەدى ول.

بوتاگوز سۇلتانوۆا

پاۆلودار وبلىستىق وتباسى ماسەلەلەرى جونىندەگى كەڭەستىڭ توراعاسى مارينا سترەلكوۆسكايا دامۋىندا ەرەكشەلىكتەرى بار بالالاردىڭ مامانداندىرىلعان مەكتەپكە دەيىنگى مەكەمەلەردە بولۋ مەرزىمىن 7 جاسقا دەيىن ۇزارتۋدى ۇسىندى. بۇل بالاباقشادان مەكتەپكە كوشۋ كەزىندە بالانىڭ دامۋ پروتسەسىن بۇزباۋعا مۇمكىندىك بەرەدى.

سونىمەن قاتار، وتىرىس بارىسىندا پارتيالىقتار Enbek.kz ەلەكتروندىق ەڭبەك بيرجاسىنىڭ جاڭارتىلعان نۇسقاسىمەن تانىستى. ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ ايتۋىنشا، ەىدۇ زەرتتەۋىنە سايكەس، جوعارى وقۋ ورىندارى مەن كوللەدجدەر تۇلەكتەرىنىڭ بىلىكتىلىگى مەن داعدىلارى بويىنشا قازاقستان دامىعان ەلدەردەن ارتتا قالىپ وتىر. وسىعان بايلانىستى، الەۋمەتتىك كودەكس شەڭبەرىندە مينيسترلىك جەكەلەگەن وسال ساناتتاردى جۇمىسپەن قامتۋعا جاردەمدەسۋدەن ەڭبەككە قابىلەتتى ازاماتتاردىڭ بارلىق ساناتتارىن ناتيجەلى جۇمىسپەن قامتۋ ءۇشىن تەڭ باستاپقى جاعدايلار جاساۋعا كوشۋدى ۇسىنادى.

وتىرىس سوڭىندا كەڭەس ورتالىق مەملەكەتتىك جانە جەرگىلىكتى اتقارۋشى ورگاندار ءۇشىن بىرقاتار ۇسىنىم دايىندادى.

ۇقساس جاڭالىقتار

Back to top button