Азия чемпионатында үш бірдей медаль жеңіп алды

Азия чемпионатында үш бірдей медаль жеңіп алды

Таиландта көркем гимнастикадан Азия чемпионаты өтті. Әлемдік додада Қазақстан құрамасы сапында өнер көрсеткен Сағина Мұратқызы үш жүлдені жеңіп алды.

Л.Н.Гумилев атындағы Еуразия ұлттық университетінің студенті жеке біріншілікке және топтық жаттығуларға өнер көрсетті. Сағина 5 құрсаумен топтық жаттығуларда Азия чемпионы атанса, құрама сапындағы командалық көпсайыста күміс медальмен және көпсайыста қола медальмен марапатталды.

Паттайя қаласындағы әлемдік жарысқа Жапония, Қытай, Оңтүстік Корея, Өзбекстан және т.б. елдердің спортшылары өзара бақ сынады.

Бүгінде дарынды гимнастшы ЕҰУ Әлеуметтік ғылымдар факультетінде «Дене шынықтыру және спорт» білім беру бағдарламасы бойынша білім алуда.

Қазақстанның бірнеше дүркін чемпионы 4 жастан бастап гимнастикамен айналысады. Сағина 2017 жылдың маусым айында жасөспірімдер арасындағы Азия чемпионатының күміс жүлдегері атанып, халықаралық дәрежедегі спорт шебері атағын алды.

Жас гимнаст еліміздің құрама сапында өнер көрсетеді. Сағина Қазақстан құрамасының бас бапкері Әлия Юсупова мен Ресейдің еңбек сіңірген жаттықтырушысы Инна Быстрицкаяның жетекшілігімен жаттығады.