ەلىمىزدە جاڭا يپوتەكالىق باعدارلاما ىسكە قوسىلماق

قازاقستاندا جاڭا يپوتەكالىق باعدارلامانى ىسكە قوسۋ جوسپارلانىپ وتىر. بۇل تۋرالى «بايتەرەك» ۇبح» اق باسقارما توراعاسى قانات شالاپاەۆ مالىمدەدى دەپ حابارلادى turkystan.kz.

«زەينەتاقى جيناقتارىنىڭ تۇرعىن ۇيگە جۇمساۋعا بولاتىن شەكتى مولشەرىنىڭ وسۋىنە جانە كەلەسى جىلى «7-20-25» باعدارلاماسىنىڭ اياقتالۋىنا بايلانىستى 500 ملرد تەڭگە يپوتەكاعا نەمەسە 35 مىڭ پاتەرگە دەگەن سۇرانىستىڭ تومەن بولۋى بولجانۋدا. جەكە قۇرىلىس سالۋشىلاردىڭ كوممەرتسيالىق تۇرعىن ءۇيدى ساتۋ جىلدامدىعى ايتارلىقتاي تومەندەۋى مۇمكىن. سۇرانىستىڭ وتەلمەۋىنە جول بەرمەۋ ماقساتىندا حالىق ءۇشىن ەكىنشى دەڭگەيلى بانكتەردىڭ نارىقتىق يپوتەكاسى بويىنشا سىياقى مولشەرلەمەسىن سۋبسيديالاۋ تەتىگىن ىسكە قوسۋ ۇسىنىلادى»، – دەدى ول ۇكىمەت وتىرىسىندا.

قازاقستان قارجىگەرلەر قاۋىمداستىعىمەن جۇرگىزىلگەن كەلىسسوزدەر ناتيجەسىندە مىناداي بازالىق شارتتار ۇسىنىلىپ وتىر.

– باستاپقى جارنا 20 پايىزدان باستالاتىن;

– كرەديت بەرۋ مەرزىمى 20 جىلعا دەيىن بولاتىن;

– قارىزدىڭ ەڭ جوعارعى سوماسى 35 ملن تەڭگەگە دەيىن جەتەتىن;

– تولەم قابىلەتتىلىگىن مىندەتتى تۇردە راستاۋدى قاجەت ەتەتىن يپوتەكا.

قانات شالاپاەۆتىڭ ايتۋىنشا، ۇلتتىق بانكتىڭ بازالىق مولشەرلەمەسىنىڭ دەڭگەيىنەن 5%-دان اسپايتىن يپوتەكا بويىنشا سىياقى مولشەرلەمەسىنىڭ 7%-ى سۋبسيديالانادى. ەكىنشى دەڭگەيلى بانكتەر ءوز قاراجاتى ەسەبىنەن قۇرىلىس سالۋشىلاردىڭ باستاپقى تۇرعىن ۇيىنە جانە قازاقستان تۇرعىن ءۇي كومپانياسىنىڭ كەپىلدىگىمەن قامتاماسىز ەتىلگەن سالىنىپ جاتقان تۇرعىن ۇيگە قارىز بەرە الادى.

«وسى باعدارلامانى ىسكە قوسۋ ءۇشىن زاڭنامالىق وزگەرىستەر قاجەت ەمەس. قازىرگى ۋاقىتتا بيۋدجەتتىك ءوتىنىم قارجى مينيسترلىگىنىڭ قاراۋىندا. بيۋدجەت ماقۇلدانعاننان كەيىن، قازاقستاندىق تۇرعىن ءۇي كومپانياسى وسى باعدارلامانى دەرەۋ ىسكە قوسۋعا دايىن»، – دەدى ول.

 

 

ۇقساس جاڭالىقتار

Back to top button