جىل باسىنان بەرى جول اپاتىنان 744 ادام كوز جۇمدى

ەلىمىزدە جىل باسىنان بەرى جول اپاتىنان 744 ادام كوز جۇمدى. بۇل تۋرالى ىشكى ىستەر مينيسترلىگىندە وتكەن بريفينگ بارىسىندا بەلگىلى بولدى دەپ حابارلادى turkystan.kz.   

ءىىم اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆانىڭ ايتۋىنشا، ەلىمىزدىڭ جولدارىندا جىل سايىن 2 مىڭنان استام ادام قازا بولادى. ودان بولەك، 20 مىڭنان استام ادام ءارتۇرلى دەنە جاراقاتىن الادى.

«وسى جىلدىڭ 6 ايىندا ەلدە 6 مىڭنان استام جول اپاتى تىركەلدى. وندا 947 ادام قازا تاۋىپ، 8110 ادام ءارتۇرلى دەنە جاراقاتىن العان. جول اپاتىنىڭ باسىم كوپشىلىگىنە جۇرگىزۋشىلەر مەن جاياۋ جۇرگىنشىلەردىڭ جول ەرەجەسىن سانالى تۇردە بۇزۋى سەبەپ بولادى»، – دەدى سپيكەر.

جول اپاتىنىڭ 95 پروتسەنتى جۇرگىزۋشىلەردىڭ كىناسىنەن بولادى. ياعني:

جىلدامدىق رەجيمىن اسىرۋ;

مانەۆر جاساۋ قاعيدالارىن بۇزۋ;

جولدىڭ قارسى بەتىنە شىعىپ كەتۋ;

جاياۋ جۇرگىنشىلەر مەن ۆەلوسيپەدشىلەردىڭ جول ەرەجەسىن بۇزۋى.

ايتا كەتسەك، جىلدامدىقتى اسىرۋعا بايلانىستى 1500-گە جۋىق فاكتى تىركەلدى. وندا 300-گە جۋىق ادام قازا تاۋىپ، 2000-عا جۋىق ادام ءارتۇرلى دەنە جاراقاتىن الدى. ال جول اپاتى سالدارىنان قازا بولعاندار مەن جاراقات العانداردىڭ تورتتەن ءبىر بولىگىن جاياۋ جۇرگىنشىلەر قۇرايدى.

سونداي-اق، جىل باسىنان بەرى 5 مىڭنان استام جول اپاتى بولىپ، 744 ادام قازا تاپتى، ال 6909 ادام دەنە جاراقاتىن الدى.

ۇقساس جاڭالىقتار

Back to top button