مەملەكەت باسشىسى ۇلتتىق دومبىرا كۇنىمەن قۇتتىقتادى

پرەزيدەنت قاسىم-جومارت توقاەۆ قازاقستاندىقتاردى ۇلتتىق دومبىرا كۇنىمەن قۇتتىقتادى دەپ حابارلادى turkystan.kz.

«بارشاڭىزدى ۇلتتىق دومبىرا كۇنىمەن شىن جۇرەكتەن قۇتتىقتايمىن! بۇل – ەلىمىز ءۇشىن ەرەكشە مەيرام. ونى ەل بولىپ اتاپ ءوتۋ ارقىلى حالقىمىزدىڭ رۋحىن كوتەرىپ، تانىمىن ارتتىرامىز. سونداي-اق، ۇلى دالا داستۇرلەرىن جاس ۇرپاقتىڭ ساناسىنا ءسىڭىرىپ، ءتول ونەرىمىزدىڭ قۇدىرەتىن تانىتامىز. شىن مانىندە، قازاقتىڭ قارا دومبىراسى – ۇلتىمىزدىڭ بويتۇمارى. ونىڭ ءۇنى ارقايسىمىزدىڭ جۇرەگىمىزگە جاقىن. ويتكەنى، قازاق پەن دومبىرا – ءبىر-بىرىنەن ءبولىپ قاراۋعا بولمايتىن ەگىز ۇعىم. اكادەميك احمەت جۇبانوۆ «دومبىرا – كوشپەلى ەلدىڭ كونەكوز شەجىرەسى» دەپ بەكەر ايتپاعان. قاستەرلى اسپاپتىڭ قوس ىشەگىنە حالقىمىزدىڭ بۇكىل بولمىسى سىيىپ تۇر»، – دەدى مەملەكەت باسشىسى.

سونداي-اق پرەزيدەنت سوناۋ كەتبۇعادان بەرى جالعاسىپ كەلە جاتقان داۋلەسكەر كۇيشىلەرىمىزدىڭ مول مۇراسى – باعا جەتپەس رۋحاني بايلىعىمىز ەكەنىن ايتتى.

«ءبىز ءتول ونەرىمىزدى دارىپتەۋ ارقىلى اسىل قۇندىلىقتارىمىزدى ۇلىقتاي تۇسەمىز. قازىر جاڭا قازاقستاندى قۇرۋعا كىرىستىك، ۇلتتىڭ جاڭا ساپاسىن قالىپتاستىرۋدى قولعا الدىق. وركەنيەتتى ەل بولۋ ءۇشىن جاڭا ءداۋىردىڭ جاقسى ۇردىستەرىن بويعا ءسىڭىرۋ جەتكىلىكسىز. سونىمەن بىرگە، سالتىمىزدى ساقتاپ، ەڭبەكقورلىق قۇندىلىقتارىن كەڭىنەن دارىپتەپ، بابالار جولىن بەرىك  ۇستانامىز.     ەندەشە، جۇرتىمىزبەن بىرگە دومبىرا دا ماڭگى جاسايدى. كۇي ونەرى ازاتتىق رۋحىن ۇرپاقتان ۇرپاققا جالعاستىرادى. دومبىرا ءار شاڭىراقتىڭ تورىندە تۇرسىن! ەلىمىزدىڭ مەرەيى تاسىپ، ابىرويى اسقاقتاي بەرسىن!»، – دەلىنگەن پرەزيدەنتتىڭ قۇتتىقتاۋىندا.

 

ۇقساس جاڭالىقتار

Back to top button