بازالىق زەينەتاقىنى ءوسىرۋ جوسپارلانىپ وتىر – مينيستر

قازاقستاندا بازالىق زەينەتاقى مولشەرىن ۇلعايتۋ جوسپارلانىپ وتىر. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا مالىمدەدى دەپ حابارلادى turkystan.kz.   

ءمينيستردىڭ ايتۋىنشا، قازىر زەينەتكە شىعىپ جاتقانداردىڭ زەينەتاقىسى بۇرىن شىققان زەينەتكەرلەرمەن سالىستىرعاندا تومەن، سەبەبى ەڭبەك ءوتىلى از.

«سوندىقتان ءبىرىنشى ماسەلە – بازالىق زەينەتاقىنىڭ پارامەترلەرىن وزگەرتۋ، ياعني ونى كوبەيتۋ. ەكىنشى – ىنتىماقتى زەينەتاقى ماسەلەسىن كوتەرۋ، ونىڭ دا پارامەترلەرىن قاراستىرۋ. ءبىز بارلىق ەسەبىمىزدى جۇمىس توبىنا وتكىزدىك، ەندى ەكىنشى كەزەڭگە شىعىپ جاتىرمىز»، – دەدى مينيستر.

ايتۋىنشا، ەڭبەك مينيسترلىگى جىل سايىنعى بيۋدجەتتىڭ 25%-ءىن تولەمدەرگە جۇمسايدى. ماسەلەن، بيىل ۆەدومستۆوعا 4 تريلليون تەڭگە بولىنسە، كەلەسى جىلى 4،5 تريلليون تەڭگەدەن اسادى.

«ءبىزدىڭ بارلىق ەسەپ-قيسابىمىز قارجى مينيسترلىگى، ۇلتتىق ەكونوميكا مينيسترلىگىنىڭ ءتيىستى دەپارتامەنتتەرىندە قارالىپ، تەكسەرىلەدى. قازىر ءبىرىنشى كەزەڭدى اياقتادىق. ەندى ەكىنشى كەزەڭدە قارجى جانە ۇلتتىق ەكونوميكا مينيسترلەرى دەڭگەيىندە قاراستىرامىز. ودان كەيىن رەسپۋبليكالىق بيۋدجەتتىك كوميسسياعا شىعامىز»، – دەدى دۇيسەنوۆا.

سونداي-اق مينيستر زەينەتاقى اننۋيتەتى ارقىلى زەينەتكە ەرتە شىعۋ جۇيەسىن جەتىلدىرۋ ماسەلەسى دە تالقىلاناتىنىن اتاپ ءوتتى.

ۇقساس جاڭالىقتار

Back to top button