Сенат және Мәжіліс депутаттары каникулға кетті
Сенат және Мәжіліс депутаттары каникулға кетті
Бүгін Мәжіліс спикері Ерлан Қошанов Парламент палаталарының бірлескен отырысында жетінші сайланған Парламенттің екінші сессиясының жабылуы және парламенттік каникул туралы айтты деп хабарлады turkystan.kz.
Депутаттар биылғы 1 қыркүйекке дейін парламенттік каникул деп жарияланатыны туралы арнайы қаулы қабылдап, Мәжіліс төрағасы Ерлан Қошанов жетінші сессияда атқарылған жұмыстар туралы баяндады.
«Екінші сессияның заңнамалық күн тәртібі айтарлықтай мазмұнды болды. Мәселен, Праламент палаталарының 4-ші бірлескен отырысы өтті. Мәжілістің 42 жалпы отырысы өтіп, онда 271 мәселе қаралды. Сенаттың 42 жалпы отырысы өтіп, онда 148 мәселе қаралды. Осы сессия кезінде қос палатаның жұмысында 127 заң жобасы болды, оның 78-і қабылданды», - деді Мәжіліс төрағасы Ерлан Қошанов.
Осы орайда, ол Парламент қабылдаған заңдардың қазіргі уақытта 66-сына Президент қол қойып, заң күшіне енгенін атап өтті.
«Әдеттегідей депутаттар елдің басты қаржылық құжаты 2022-2024 жылдарға арналған республикалық бюджетке және оны нақтылауға баса мән берді. Мемлекеттік әлеуметтік міндеттемелерді толық көлемде орындауға, денсаулық сақтауға, білім беруге, инфрақұрылымды дамытуға, шағын және орта бизнесті қолдауға және басқа да маңызды мәселелерге қомақты қаражат бөлінді. 2022 жылы қаңтардан бастап ең төменгі жалақы 42 500 теңгеден 60 мың теңгеге дейін өсті. Республикалық бюджетті қарау барысында депутаттық корпус азаматтық қызметшілердің жекелеген санаттарының жалақысын орта есеппен 20 пайызға арттыру үшін қаражат бөлуді көздеді. Жалпы алғанда, шамамен 1,2 млн азаматтық қызметшінің жалақысы өсті. Олардың қатарында педагогтер, медицина қызметкерлері және әлеуметтік қызметкерлер, кітапханашылар, музей қызметкерлері, орманшылар, сондай-ақ басқа саланың өкілдері бар», - деді Мәжіліс төрағасы.
Оның айтуынша, нақтыланған республикалық бюджетте қаңтар оқиғаларының салдарын жою жөніндегі, күштік құрылымдар мен төтенше жағдайлар органдарының жауынгерлік әзірлігі мен жарақтандырылуын арттыру жөніндегі іс-шараларды қаржылындыруға ерекше назар аударылды.
«Халықтың табысын арттыру бағдарламасы, азық-түлік қауіпсіздігін қамтамасыз ету жоспары және өңірлер мен бизнесті қолдау әрі дамыту жөніндегі іс-шаралар бюджеттің қажетті қаражатымен нығайтылды. Депутаттық корпус заң шығару қызметінде Мемлекет басшысының тапсырмалары мен ол ұсынған жүйелі реформаларды практикалық тұрғыдан іске асыруға басымдық берді», - деді Е. Қошанов.
Ол күзгі сессияда депутаттар Мемлекет басшысының ұсынған бастамаларын жүзеге асыратынын айтты.
Сондай-ақ Қошанов Парламенттің қос палатасының мүшелеріне осы сессиядағы жұмыс үшін алғыс айтты.
«Жұмысымызды жоғары деңгеде жазып, көрсетіп жүрген БАҚ құралдарына да алғыс айтқым келеді. Алдағы жұмысымызда біз Мемлекет басшысының реформалары мен бастамаларын бірге жүзеге асыру үшін жұмылуымыз керек. Елімізде болып жатқан өзгерістерге әрқайсымыз бір кісідей қарап, жұмыла кіріссек қана, Жаңа Қазақстан құрамыз», - деді Қошанов.