اتىراۋدا قىرىلعان شاعالالاردان قۇس تۇماۋى انىقتالدى

ەكولوگيا، گەولوگيا جانە تابيعي رەسۋرستار مينيسترلىگى اتىراۋداعى شاعالالاردىڭ قىرىلۋىنا قاتىستى اقپارات بەردى دەپ حابارلادى turkystan.kz.   

قاشاعان كەن ورنىنىڭ ەكى جاساندى ارالىندا قارا-الا تۇقىمدى شاعالا قۇسىنىڭ جاپپاي قىرىلۋ فاكتىسى انىقتالدى. قىرىلعان قۇستىڭ قازىرگى سانى 2750-گە جەتتى.

وسىعان بايلانىستى اتىراۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى ارنايى كوميسسيا قۇرىپ، اتالعان ايماققا باردى. قۇستاردىڭ ءولۋ سەبەبىن انىقتاۋ ماقساتىندا سۋ، توپىراق جانە اۋا سىناماسى، سونىمەن قاتار قۇستاردىڭ ولەكسەسى زەرتتەۋگە الىندى.

«زەرتتەۋ ناتيجەسىندە ولگەن قۇستاردىڭ سىناماسىنان ان5 قۇس تۇماۋى انىقتالىپ وتىر»، – دەلىنگەن مينيسترلىك حابارلاماسىندا.

قازىر اتىراۋ وبلىسىنىڭ اۋماعىندا قۇستاردىڭ جاعدايىنا تولىق مونيتورينگ جۇرگىزىلىپ جاتىر.

ەسكە سالساق، اتىراۋ وبلىسىندا «قىزىل كىتاپقا» ەنگەن شاعالا قىرىلىپ جاتقانى حابارلانعان ەدى. 2022 جىلدىڭ 26 ​​ماۋسىمىندا «اقجايىق» مەملەكەتتىك تابيعي رەزەرۆاتى اۋماعىندا مەكەمە ينسپەكتورلارى قۇستاردىڭ ءولۋ فاكتىسىن راستادى.

ۇقساس جاڭالىقتار

Back to top button