ەندى جەكە كۋالىكتى 5-10 مينۋت ىشىندە الۋعا بولادى - مۋسين

جاقىندا قازاقستاندىقتار جەكە كۋالىكتى 5-10 مينۋتتىڭ ىشىندە الا الاتىن بولادى. بۇل تۋرالى ءوزىنىڭ Facebook-تەگى پاراقشاسىندا تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين جازدى دەپ حابارلادى turkystan.kz.

«ءبىز ىشكى ىستەر مينيسترلىگىمەن بىرگە بىرتىندەپ ارنايى تەرمينالداردى قولدانىسقا ەنگىزەمىز، ءسويتىپ قۇجاتتاردى ميگراتسيا ماماندارىنا جۇگىنبەي-اق، تەرمينال ارقىلى رەسىمدەۋگە بولادى»، – دەپ جازدى مينيستر.

سونداي-اق ول 28 ماۋسىم كۇنى ۇكىمەت وتىرىسىندا مەملەكەتتىك قىزمەتتەردى تسيفرلاندىرۋ بارىسى تۋرالى ايتىپ، سەنات دەپۋتاتتارى الدىندا جاڭا زاڭ جوباسى بويىنشا بايانداما جاساعانىن جازدى.

«زاڭ جوباسىندا يننوۆاتسيا، تسيفروۆيزاتسيا جانە اقپاراتتىق قاۋىپسىزدىك سالاسىنا وزگەرىستەر مەن ونلاين-قىزمەتتەردى جىلدامىراق ەنگىزۋدى كوزدەيتىن ءىس-شارالار قاراستىرىلعان.

ءبىرىنشى كەزەكتە، مەملەكەتتىك اپپاراتتى بيۋروكراتيادان ارىلتۋ، ياعني ادامي فاكتوردى ازايتىپ، قىزمەت كورسەتۋ ۋاقىتىن قىسقارتۋعا باعىتتالعان. پلاتفورمالىق مودەل مەن بىرىڭعاي ارحيتەكتۋرا قالىپتاستىرۋ ارقىلى شىعىنى كوپ شاشىراڭقى اقپاراتتىق جۇيەلەردى رەتتەپ، قاجەتسىز بازالاردى قىسقارتۋعا بولادى. ناتيجەسىندە، مەملەكەتتىك قىزمەتتەردى كورسەتۋ جىلدامدىعى ارتىپ، ازاماتتارعا دا، مەملەكەتتىك ورگاندارعا دا قولايلى جانە ءتيىمدى جاعداي جاسالادى.

شالعاي اۋىلداردا تۇراتىن قازاقستاندىقتار ءۇشىن «تسيفرلىق نۇكتەلەر» اشىلادى. بۇل ماسەلەنى قازپوشتادا جۇمىس ىستەپ جۇرگەندە كوتەرگەن ەدىم. بارىنە بەلگىلى، قازاقستاننىڭ تۇكپىر-تۇكپىرىندە، ءتىپتى ەڭ شالعاي اۋىلدارىندا قازپوشتانىڭ عانا بولىمشەلەرى بار، سوندىقتان وسى بولىمشەلەردە تەك پوشتا قىزمەتتەرى ەمەس، مەملەكەتتىك قىزمەتتەردى دە ۇسىنىلاتىن بولادى. ايتپەسە تۇرعىندار قالاداعى نەمەسە اۋدان ورتالىعىنداعى حقكو-عا بارۋعا ءماجبۇر.

تسيفرلىق قۇجاتتار ماسەلەسىنە كەلسەك، زاڭدا تسيفرلىق قۇجاتتار قاعاز نۇسقامەن تەڭ دارەجەدە قولدانىلاتىنى تۋرالى نورما قاراستىرىلعان.

سونداي-اق جۋىردا قازاقستاندىقتار جەكە كۋالىكتى 5-10 مينۋتتىڭ ىشىندە الا الاتىن بولادى. ءبىز ءىىم-مەن بىرگە بىرتىندەپ ارنايى تەرمينالداردى قولدانىسقا ەنگىزەمىز، ءسويتىپ قۇجاتتاردى ميگراتسيا ماماندارىنا جۇگىنبەي-اق، تەرمينال ارقىلى رەسىمدەۋگە بولادى»،-دەيدى باعدات مۋسين.

ونىڭ سوزىنشە، الىس ەلدى مەكەندەردى بايلانىسپەن قامتۋ ماسەلەسى بويىنشا بايلانىس جەلىسىن ەلەكتر جەتكىزۋ جەلىلەرىنىڭ باعاندارى ارقىلى وتكىزۋ مۇمكىندىگىن قاراستىرىپ جاتىرمىز. ياعني ەلەكتر جەتكىزۋ جەلىلەرى بار جەرگە بايلانىس تا وتكىزىلەدى. ال، مۇنداي مۇمكىندىك بولماعان جەرلەرگە سپۋتنيك ارقىلى جەتكىزەتىن بولامىز.

ۇقساس جاڭالىقتار

Back to top button