«بيداي قىمبات»: سولتۇستىكتىڭ ديىرمەندەرى ءۇش ايدان بەرى توقتاپ تۇر

قىزىلجاردا ەكسپورتقا جۇمىس ىستەيتىن ءىرى ديىرمەندەر بىرنەشە ايدان بەرى تۇرالاپ قالدى. سەبەبى، ايماقتا بيدايدىڭ باعاسى تىم شارىقتاپ كەتكەن. تەرىسكەيدە استىقتىڭ ءبىر تونناسى 180 مىڭ تەڭگەگە دەيىن جەتتى دەپ حابارلادى turkystan.kz.   

بيداي وڭدەۋ كاسىپورىندارى نە ىستەرىن بىلمەي دال. قازاقستان – ۇن ەكسپورتى بويىنشا الەمدە ەكىنشى ورىندا. الايدا، جاقىن ارادا ەلىمىز ۇزدىكتەردىڭ قاتارىندا بولماۋى مۇمكىن. اۋعانستاندى تۇتاستاي ۇنمەن قامتاماسىز ەتكەن سولتۇستىكتىڭ الپاۋىت ديىرمەندەرى ءۇش ايدان بەرى توقتاپ تۇر. رەسەي بيداي ەكسپورتىن دوعارعان سوڭ، قازاقستاندا بيداي قۇنى لەزدە قىمباتتاپ كەتتى دەيدى. وسىنىڭ سالدارىنان كاسىپورىندار ارزان شيكىزاتقا قول جەتكىزە الماي قالعان دەلىنگەن Astana.tv سيۋجەتىندە.

«رەسەيلىك استىق قازاقستاندىكىمەن سالىستىرعاندا 10-15 مىڭعا ارزانداۋ بولدى. تەرىسكەيدەگى كورشىمىز ەكسپورتتى جاپقان سوڭ، ءبىزدىڭ ديقاندار بىلتىر جينالعان بيدايدىڭ قۇنىن سەبەپسىز كوتەرىپ جىبەردى. قازىر بيدايدىڭ تونناسى 160-180 مىڭ تەڭگەنىڭ ارالىعىندا ساۋدالانىپ جاتىر. ال ۇننىڭ باعاسى شەتەل نارىقتارىندا 185 مىڭنان ساتىلۋدا. 5 تەڭگە  ايىرماشىلىق ءبىزدىڭ شىعىندى اقتامايدى»، – دەيدى ديىرمەننىڭ كوممەرتسيالىق ديرەكتورى تايسيا كوللەگوۆا.

ال تاناپ باسىنداعى شارۋالار  شىعىن  كوپ بولعان سوڭ بيدايدىڭ باعاسىن كوتەرگەنىن ايتادى.

«قازىر مەملەكەت سۋبسيديانى اياماي تولەپ جاتىر، ديزەلدىك وتىندى دا تومەندەتىلگەن باعامەن ۇسىنادى. بىراق تەحنيكانىڭ بولشەكتەرىنە دەگەن باعا سوڭعى ۋاقىتتا ەكى ەسە قىمباتتادى. ال تىڭايتقىشتاردىڭ قۇنى گەوساياسي تۇراقسىزدىقتىڭ سالدارىنان 50 پروتسەنتكە كوتەرىلدى. وسىنىڭ بارلىعى استىق باعاسىنىڭ شارىقتاۋىنا اكەپ سوقتى. بۇل – نارىق تالابى. ەشكىم قىمباتشىلىقتى قولدان جاساپ وتىرعان جوق»، – دەيدى ديقانشى ولەگ ادام.

بىلتىر ەلىمىزدەگى ديقاندار 12 ميلليون تونناعا جۋىق استىق جيناعان. 7 ميلليوننان استام توننا بيداي  ەكسپورتقا جىبەرىلسە، قالعانى ىشكى نارىقتا. ساراپشى ەۆگەني كارابانوۆتىڭ ايتۋىنشا، استىقتىڭ قىمباتتاۋى قالىپتى جاعداي.

«وتكەن جىلى قۋاڭشىلىق بولىپ، بىزدە ەگىن از جينالدى. شارۋالار ءبىرازىن ساتىپ، قازىر ازعانتاي بولىگىن ساقتاپ وتىر. وسىعان دەيىن وتاندىق بيداي ەكسپورتقا شىعارىلدى. ال جەرگىلىكتى ديىرمەندەر رەسەيلىك ارزان بيدايدىڭ ارقاسىندا پايدا كورىپ وتىردى. قازىر رەسەيلىك ەكسپورت بولماعان  سوڭ، ىشكى بيدايعا سۇرانىس ارتىپ، باعا كوتەرىلدى. بۇل ۋاقىتشا قۇبىلىس دەپ ويلايمىن. جاقىن ارادا جاعداي تۇراقتالادى»، – دەيدى قازاقستان بيداي وداعىنىڭ رەسمي وكىلى ەۆگەني كارابانوۆ.

ۇقساس جاڭالىقتار

Back to top button