ەلدە Pfizer ۆاكتسيناسىنىڭ جارامدىلىق مەرزىمى ۇزارتىلدى

قازاقستاندا Pfizer ۆاكتسيناسىن قولدانۋ جونىندەگى نۇسقاۋلىققا وزگەرىستەر ەنگىزىلىپ، پرەپاراتتىڭ جارامدىلىق مەرزىمى ۇزارتىلدى.ەندى قالعان دوزالاردى قىركۇيەك پەن قازانعا دەيىن قولدانۋعا بولادى دەپ حابارلادى turkystan.kz كتك تەلەارناسىنا سىلتەمە جاساپ.

بۇعان دەيىن Pfizer ۆاكتسيناسىنىڭ سوڭعى ساتىپ الىنعان پارتياسىنىڭ جارامدىلىق مەرزىمى شىلدە ايىنىڭ سوڭىنا دەيىن ەكەنى حابارلانعان بولاتىن. دەنساۋلىق ساقتاۋ مينيسترلىگى ۆاكتسينانىڭ مەرزىمى وتكەن جوق جانە ساپاسىن جوعالتپادى دەپ سەندىرەدى.

مۇنىڭ ءبارى ساقتاۋ شارتتارىنا بايلانىستى. امەريكالىق وندىرۋشىلەر بۇل پارتيانى پايدالانۋ مەرزىمىن ءساۋىر ايىندا ۇزارتتى. تالاپ – مينۋس 90 گرادۋستان مينۋس 60 گرادۋسقا دەيىنگى تەمپەراتۋرانىڭ ساقتالۋى.

ماۋسىم ايىنىڭ سوڭىندا قازاقستاندا Pfizer-ءدىڭ ءبىرىنشى كومپونەنتىن 1،2 ميلليوننان استام ادام الدى. ەكىنشى كومپونەنت رەتىندە 1،1 ميلليونعا جۋىق قازاقستاندىققا سالىندى.

سوڭعى مالىمەتتەر بويىنشا، ەلدە امەريكالىق پرەپاراتتىڭ 300 مىڭ دوزاسى قالعان. كوۆيد كورسەتكىشىنىڭ وسۋىنە بايلانىستى دارىگەرلەر قازاقستاندىقتاردى ۆاكتسيناتسيالاۋ ارقىلى ۆيرۋستان قورعانۋعا تاعى دا شاقىردى.

«ۆاكتسيناتسيا جانە رەۆاكتسيناتسيا بىزدە توقتاعان جوق. ەلدە ۆاكتسينا تاپشىلىعى جوق. Pfizer، Vero Cell جانە ءبىزدىڭ وتاندىق QazVac ۆاكتسيناسى. ءاربىر ازامات ۇجىمدىق يممۋنيتەتتى ساقتاۋ ءۇشىن رەۆاكتسيناتسيادان ءوتۋى كەرەك. ۆاكتسيناتسيا ەمحانالار مەن ۆاكتسيناتسيا پۋنكتتەرىندە جۇرگىزىلەدى»، – دەدى سانيتارلىق-ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتاناەۆ.

ۇقساس جاڭالىقتار

Back to top button