بيزنەسكە دە، ۇكىمەتكە دە اشىق ءارى تۇسىنىكتى سالىق جۇيەسى قاجەت – ەرلان قوشانوۆ

پارتيا سىزدەردىڭ بارلىق سىندارلى ۇسىنىستارىڭىزدى قولداۋعا دايىن. بۇگىنگى تالقىلاۋ – جاڭا سالىق جۇيەسىن قالىپتاستىرۋ جولىنداعى ستراتەگيالىق مىندەتتەردى شەشۋدەگى ۇلكەن بىرلەسكەن جۇمىستىڭ باستاماسى.     

بۇل تۋرالى «اMANAT» پارتياسىنىڭ توراعاسى، پارلامەنتتىك فراكتسيا جەتەكشىسى ەرلان قوشانوۆ سالىق زاڭناماسىن جەتىلدىرۋ ماسەلەلەرىنە ارنالعان جيىندا اتاپ ءوتتى دەپ حابارلادى turkystan.kz  ءماجىلىستىڭ ءباسپاسوز قىزمەتىنە سىلتەمە جاساپ.

«مەملەكەت باسشىسى العا قويعان باستى مىندەت – تۇراقتى جانە بولجامدى سالىق جۇيەسىن قالىپتاستىرۋ. ياعني، ناقتى تاپسىرما بەرىلدى. ول – سالىق زاڭناماسىن نەگىزگى پارامەترلەرگە سايكەس تۇراقتاندىرۋ. بۇل، ەڭ الدىمەن، بيزنەستى قولداۋ، ونىڭ سالىق ەرەجەلەرىنىڭ ۇنەمى وزگەرتىلۋى سالدارىنان زارداپ شەكپەۋى ءۇشىن قاجەت»، – دەدى ءماجىلىس توراعاسى.

ەرلان قوشانوۆ ۇكىمەتتىڭ قوسىلعان قۇن سالىعى (ققس) جانە كورپوراتيۆتىك تابىس سالىعى (كتس) مولشەرلەمەلەرىن ارتتىرۋ تۋرالى ۇسىنىسىنا تۇسىنىك بەرە وتىرىپ، تۇراقتىلىق كولەمدە ەمەس، ول ورتا مەرزىمدى ينۆەستيتسيالىق كەزەڭگە، ماسەلەن، كەمىندە 3 جىلعا ارنالعان مولشەرلەمەلەردىڭ تۇراقتىلىعىن بىلدىرەتىنىن اتاپ ءوتتى. بۇل ينۆەستورلارعا دا، كاسىپكەرلەرگە دە تۇسىنىكتى بولار ەدى.

پارتيا توراعاسى سالىقتىق اكىمشىلەندىرۋ ۇدەرىسىن ۇنەمى جەتىلدىرىپ وتىرۋ قاجەتتىگىنە دە نازار اۋداردى.

سونىمەن قاتار ەرلان قوشانوۆ سالىق سالۋدىڭ سەرۆيستىك مودەلىنە توقتالعان الىمدار مەن تولەمدەردىڭ كوپشىلىگى اۆتوماتتاندىرىلىپ، پرواكتيۆتى فورماتتا جۇزەگە اسىرىلۋعا ءتيىس ەكەنىن ايتتى. بۇل ۇزاققا سوزىلىپ كەلە جاتقان سالىق جۇيەسىن تسيفرلاندىرۋ اياقتالعاننان كەيىن عانا مۇمكىن بولادى.

«ءبىز بۇل تۋرالى بىرنەشە جىلدان بەرى ەستىپ كەلەمىز. بىراق ءالى كۇنگە دەيىن ناتيجە جوق. ەڭ الدىمەن تسيفرلىق تەحنولوگيالارعا نەگىزدەلگەن سالىق سالۋدىڭ اشىقتىعىنا، قاراپايىمدىلىعىنا جانە سالىق ورگاندارىنىڭ تۇتىنۋشىعا باعدارلانعان قىزمەتىنە ۇمتىلۋىمىز كەرەك»، – دەدى پارتيا توراعاسى.

سالىق سالاسىنىڭ وزەكتى ماسەلەلەرىن تالقىلاۋعا ارنالعان جيىنعا پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ، كاسىپكەرلەر قۇقىقتارىن قورعاۋ جونىندەگى ۋاكىل رۇستەم ءجۇرسىنوۆ تە قاتىستى.

بيزنەسكە دە، ۇكىمەتكە دە اشىق ءارى تۇسىنىكتى سالىق جۇيەسى قاجەت – ەرلان قوشانوۆ

«اتامەكەن» ۇكپ پرەزيديۋمىنىڭ توراعاسى  رايىمبەك باتالوۆ دەپۋتاتتار الدىندا سالىق زاڭناماسىن جەتىلدىرۋ جونىندەگى پالاتا ۇسىنىستارىن ورتاعا سالدى. «شەتەلدىك ينۆەستورلاردىڭ قازاقستاندىق كەڭەسى» قاۋىمداستىعىنىڭ وكىلى رومان يۋرتاەۆ سالىق جۇيەسىنىڭ تۇراقتىلىعى مەن اشىقتىعى تۋرالى ايتتى.

ودان ءارى ءماجىلىس دەپۋتاتتارى امانجان جامالوۆ پەن ەكاتەرينا سمىشلياەۆا ءسوز سويلەدى.

امانجان جامالوۆ سالىق زاڭناماسى وسىدان 20 جىل بۇرىن قالىپتاسقانىنا  قاراماستان، سالىق جۇيەسىن بىرىڭعاي جانە تۇراقتى دەپ ايتۋعا كەلمەيتىنىن اتاپ ءوتتى.

«2001 جىلدان بەرى سالىق كودەكسى ءۇش رەت قابىلداندى. قولدانىستاعى – ءۇشىنشىسى. وعان 2017 جىلدان باستاپ 34 زاڭ اياسىندا 707 تۇزەتۋ ەنگىزىلدى. نورماتيۆتىك قۇقىقتىق اكتىلەردىڭ اقپاراتتىق-قۇقىقتىق جۇيەسىندە كودەكستىڭ 47 ارحيۆتىك رەداكتسياسى بار. ياعني، وزگەرىستەر وتە ءجيى ەنگىزىلەدى. بىراق سالىق جۇيەسى مودەلىنىڭ ءوزى 2008-2009 جىلداردان بەرى وزگەرمەگەن»، – دەدى دەپۋتات.

وسى رەتتە ءادىل، تۇراقتى جانە بولجامدى سالىق ساياساتىن قامتاماسىز ەتۋ بويىنشا پرەزيدەنت العا قويعان مىندەتتەردى شەشۋ ءۇشىن دەپۋتات سالىق بويىنشا جاڭا مولشەرلەمەلەر قابىلدانعان كۇننەن باستاپ ءۇش جىلدان كەيىن عانا كۇشىنە ەنەتىنى تۋرالى نورمانى سالىق كودەكسىنىڭ دەڭگەيىندە بەكىتۋدى ۇسىندى.

سونداي-اق، ا.جامالوۆتىڭ پىكىرىنشە، ءار ءتۇرلى سالالاردا ءادىل سالىق جۇكتەمەسىن قامتاماسىز ەتۋ قاجەت، سونىمەن بىرگە ءار ءتۇرلى سالىقتىق ەمەس جانە بيۋدجەتتەن تىس تولەمدەردى كوديفيكاتسيالاۋ كەرەك.

ءوز سوزىندە دەپۋتات بارلىق مىندەتتى سالىقتىق ەمەس تولەمدەر مەن ولاردىڭ مولشەرلەمەلەرى بىرىڭعاي سالىق كودەكسىندە كورسەتىلۋى كەرەكتىگى تۋرالى ۇستانىمىن جەتكىزدى. بۇل كاسىپكەرلەر مەن ينۆەستورلار ءۇشىن ناقتى شەشىم قابىلداۋىنا سەپتىگىن تيگىزەدى.

سونىمەن قاتار «AMANAT» پارتياسى فراكتسياسىنىڭ مۇشەسى تاۋەكەل دەڭگەيى تومەن سالىق تولەۋشىلەردى تەكسەرۋدەن باس تارتا وتىرىپ، شاعىن بيزنەس ءۇشىن ارنايى سالىق رەجيمدەرىن اياعىنا دەيىن قاراستىرۋدى ۇسىندى. سالىق كودەكسى تىكەلەي قولدانىلاتىن زاڭعا اينالۋعا ءتيىس ەكەنىن اتاپ ءوتتى. وسى ورايدا، دەپۋتات 2018 جىلدان بەرى ۇكىمەت پەن قارجى مينيسترلىگى تاراپىنان سالىق كودەكسىنىڭ اياسىندا 169 قاۋلى مەن بۇيرىق قابىلدانعانىن ايتتى.

ال ەكاتەرينا سمىشلياەۆا سالىق سالاسىن تسيفرلاندىرۋ بويىنشا بىرقاتار تاسىلدەردى اتاپ بەردى.

وتىرىستى قورىتىندىلاي كەلە، «AMANAT» پارتياسىنىڭ توراعاسى ەرلان قوشانوۆ سالىق سالۋ ماسەلەسى بويىنشا مەملەكەت پەن بيزنەس، ەڭ باستىسى، حالىق مۇددەسى اراسىندا تەڭگەرىمدى قاتاڭ ساقتاۋ فراكتسيا مىندەتى ەكەنىن  اتاپ ءوتتى.

ەرلان قوشانوۆتىڭ ايتۋىنشا، قازىر ۇكىمەت سالىق ساياساتىنىڭ جاڭا تۇجىرىمداماسى بويىنشا جۇمىس جۇرگىزۋدە. وسىعان بايلانىستى ءماجىلىس سپيكەرى كۇزگە دەيىن بۇگىن پارتيا الاڭىندا ايتىلعان بارلىق ۇسىنىستاردى ەسكەرۋ قاجەتتىگىن ايتىپ، ونى ءماجىلىس جانىنان قۇرىلعان قوعامدىق پالاتا وتىرىستارىنىڭ بىرىندە اشىق تالقىلاۋدى ۇسىندى.

 

ۇقساس جاڭالىقتار

Back to top button