ەلىمىزدە تۇرمىستىق تەحنيكا 18 پايىزعا قىمباتتادى

قازاقستاندىقتاردىڭ  ءۇي شارۋاشىلىعى 100 پايىز اس ءۇي پليتاسى، 99،7 پايىز توڭازىتقىش، 96،1 پايىز كىر جۋعىش ماشيناسى، 94،1 پايىز شاڭسورعىش، 79،1 پايىز قىسقا تولقىندى پەشپەن قامتىلعان دەپ حابارلادى turkystan.kz Elorda.info سايتىنا سىلتەمە جاساپ.

ەلىمىزدە مۇزداتقىش كامەرا، مۋلتيۆاركا، تىگىن ماشيناسى، كونديتسيونەر، جىلىتقىش، ىدىس جۋعىش ماشينا سياقتى تۇرمىستىق قۇرالداردى ساتىپ الۋ كورسەتكىشى تومەن.

2021 جىلى ساۋالناماعا ەلىمىزدىڭ بارلىق وڭىرلەرىندە 11،7 مىڭ ءۇي شارۋاشىلىعى قاتىستى. قالالىق جەرلەردە تۇراتىن حالىقتىڭ كىر جۋعىش ماشينا، شاڭسورعىش، ميكروتولقىندى پەش، مۋلتيۆاركا، كونديتسيونەر، جىلىتقىش، ىدىس جۋعىش ماشينا سياقتى تۇرمىستىق قۇرالدارمەن قامتاماسىز ەتىلۋ دەڭگەيى اۋىل حالقىنا قاراعاندا جوعارى.

سونىمەن قاتار اۋىل تۇرعىندارىن توڭازىتقىش، مۇزداتقىش، تىگىن ماشيناسىمەن قامتاماسىز ەتۋ، كەرىسىنشە، قالا تۇرعىندارىنا قاراعاندا جوعارى.

اعىمداعى جىلدىڭ ءساۋىر ايىنىڭ قورىتىندىسى بويىنشا ەلىمىزدە تۇرمىستىق تەحنيكا باعاسى ءبىر جىلدا 18،1%-عا ءوستى. باعانىڭ كوتەرىلۋى الماتى وبلىسىنان بايقالدى. جامبىل جانە سولتۇستىك قازاقستان وبلىستارىندا دا 20 پايىزعا دەيىن كوتىرىلگەن. ونىڭ ىشىندە توڭازىتقىش پەن مۇزداتقىش جىلىنا 15،8%- عا، اس ءۇي پليتالارى 17،2%-عا، كىر جۋعىش جانە ىدىس جۋاتىن ماشينالار 22%-عا، شاڭسورعىش 25،1%-عا قىمباتتادى.

ايتا كەتەيىك، ەلىمىزدەگى تۇرمىستىق قۇرالداردىڭ باسىم كوپشىلىگى يمپورتتىق. اعىمداعى جىلدىڭ ءبىرىنشى توقسانىنىڭ قورىتىندىسى بويىنشا ەلىمىزدە بارلىعى 322 تۇرمىستىق توڭازىتقىش پەن مۇزداتقىش ءوندىرىلدى.

سونىمەن قاتار سەكتورداعى يمپورت 144،9 مىڭ بۇيىمدى قۇرادى. ءبىرىنشى توقساندا قازاقستاندا مۇلدەم وندىرىلمەيتىن 150،8 مىڭ كىر جۋاتىن ماشينا مەن كىر كەپتىرەتىن ماشينا، 89،1 مىڭ تۇرمىستىق شاڭسورعىش، 181،9 مىڭ ميكسەر، ۇساقتاعىش پەن شىرىن سىققىش جانە ت.ب. اكەلىندى.

ۇقساس جاڭالىقتار

Back to top button